छत्रपती संभाजीनगर (मेट्रोपोलिस पोस्ट वृत्तसेवा) : सिडको कॅनॉटजवळील एसबीआय बँकेच्या सिग्नलजवळ सुसाट अलिशान कारने दुचाकीवरून जात असलेल्या तिघा बापलेकांना उडवले आणि पसार झाला. यात तिघेही जखमी झाले. ही घटना सोमवारी (२३ मार्च) पहाटे साडेबाराच्या सुमारास (मध्यरात्री) घडली.
शेख अन्वरमशिउद्दीन शेख मुनतजीबउद्दीन (वय ४५, रा. असेफिया कॉलनी) यांनी या प्रकरणात तक्रार दिली आहे. ते खासगी नोकरी करतात. सोमवारी (२३ मार्च) पहाटे सव्वा बाराच्या सुमारास ते पावरलूम चिकलठाणा येथून घरी आसेफिया कॉलनीकडे दुचाकीने (MH20 FX4793) जात होते. सोबत त्यांची मुले रय्यामोद्दीन (वय १७) व अब्बुबक्कर (वय १२) होते. साडेबाराच्या सुमारास कॅनॉट येथून एसबीआय बँकेच्या सिग्नलजवळ रोडवरून जात असताना सिडको बसस्टॅण्डकडून हर्सूल टी पॉइंटकडे सर्व्हिस रोडने जाणारी एक पांढरी कार सुसाट आली आणि अन्वरमशिउद्दीन यांच्या दुचाकीला मागून धडक दिली.
तिघेही बापलेक रस्त्यावर पडून जखमी झाले. मोटारसायकलीचेही मोठे नुकसान झाले. कार इतकी सुसाट निघून गेली, की अंधारात तिचा नंबरही पाहता आला नाही. जखमी अवस्थेत बापलेक घरी गेले. तिथून घाटी रुग्णालयात जाऊन त्यांनी उपचार घेतले. सोमवारी दुपारी अडीचला सिडको पोलीस ठाण्यात येऊन तक्रार दिली. पोलिसांनी कारचालकाविरुद्ध गुन्हा दाखल केला आहे. परिसरातील सीसीटीव्ही फूटेज तपासून कारचा तपास केला जात आहे. अधिक तपास पोलीस अंमलदार ज्ञानोबा जोमदे करत आहेत.
.jpg)
.jpg)
