छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर शहराजवळील लिंक रोडवरील काबरू हाऊस हॉटेलमध्ये चार गुन्हेगारांनी तलवार नाचवली. कर्मचाऱ्यांना मारहाण केली. अन्य ग्राहकांनाही धमकावले. १४ हजार ३३३ रुपयांची दारू पिल्यानंतर ते बिल बुडविण्यासाठी मॅनेजरला खुनाची धमकी देत त्याच्याच खिशातून ५ हजार रुपये काढून घेतले आणि टोळके पसार झाले. हा धक्कादायक प्रकार रविवारी (२२ मार्च) पहाटे १ च्या सुमारास (मध्यरात्री) घडली.
विकास रहाटवाडे व सारंग तरमगे (रा. कांचनवाडी) अशी टवाळखोरांची नावे असून, त्यांच्यासोबत आणखीही दोघे होते. या चौघांचा सातारा पोलीस कसून शोध घेत आहेत. या प्रकरणात आकाश कांतीलाल गोलेच्छा (वय २९, रा. राजाबाजार) यांनी तक्रार दिली आहे. ते हॉटेल काबरू हाऊसमध्ये व्यवस्थापक आहेत. विकास, सारंग व त्यांचे दोन मित्र शनिवारी रात्री १० ला हॉटेलमध्ये आले. मध्यरात्रीनंतर पहाटेच्या १ पर्यंत त्यांनी दारू पिली. त्यांचे बिल १४ हजार ३३३ रुपये झाले. बिल मागण्यासाठी कर्मचारी आला असता चौघांनी हॉटेलमधील अमराठी कर्मचाऱ्यांवरून वाद घालायला सुरुवात केली.
कंबरेची तलवार काढून बारमध्ये फिरवली आणि चौघेही आरडाओरड करत हॉटेल कर्मचारी आणि अन्य ग्राहकांना धमकावू लागले. आकाश गोलेच्छा यांना मारहाण करत त्यांच्या खिशातील ५ हजार रुपये हिसकावले. नंतर गोलेच्छा यांनाच माफी मागायला लावली. नंतर कारमध्ये (क्र. एमएच २० ईएक्स १४३१) बसून निघून गेले. गोलेच्छा यांच्या तक्रारीवरून चौघांविरुद्ध सातारा पोलिसांनी गुन्हा दाखल केला असून, अधिक तपास पोलीस उपनिरीक्षक नंदकुमार भंडारे करत आहेत. पोलीस सूत्रांनी सांगितले, की चौघांपैकी दोघांची ओळख पटली असून, विकासने संदीप ऊर्फ गुज्जर मुळेकर याच्यासोबत मिळून १२ सप्टेंबर २०२१ रोजी त्यांचा मित्र महेश काकडे याची हत्या केली होती. त्या गुन्ह्यात काही महिन्यांपूर्वी तो जामिनावर सुटला आहे, तर सारंगविरुद्ध यापूर्वी मारहाणीचे गुन्हे दाखल आहेत.
.jpg)
.jpg)
