छत्रपती संभाजीनगर (मेट्रोपोलिस पोस्ट वृत्तसेवा) : वडील वारल्यानंतर आईनेही दोन वर्षांत दुसरे लग्न करून घेतले. त्यामुळे १६ वर्षीय पुतण्याला सांभाळण्याची जबाबदारी काका-काकूंवर आली. आता त्याला कुणीतरी फूस लावून पळविल्याची घटना समोर आल्याने काका-काकू हादरून गेले असून, काकूने सिटी चौक पोलिसांत धाव घेऊन अपहरणाची तक्रार शनिवारी (२१ मार्च) दुपारी तीनला नोंदवली आहे.
३५ वर्षीय काकूने दिलेल्या तक्रारीत म्हटले आहे, की त्या व त्यांचे पती घरगुती मेस चालवतात. दोन मुली व पुतण्यासह हे दाम्पत्य सिटी चौक परिसरात राहते. सन २०२१ मध्ये त्यांच्या मोठ्या दिराचे हृदयविकाराने निधन झाले. त्यांच्या पत्नीनेही दुसरे लग्न केल्याने त्यांच्या मुलाला २०२३ पासून हे दाम्पत्य सांभाळत आहे. तो समर्थनगरातील इंग्रजी शाळेत १० वीत शिकतो. १८ मार्चला पुतण्याचा दहावी परीक्षेचा शेवटचा पेपर असल्याने त्याला नेहमीप्रमाणे सकाळी साडेदहाला काकूने परीक्षा केंद्रावर सोडले.
त्याला घेण्यासाठी दुपारी दीडला गेल्या असता तो दिसून आला नाही. सर्व मुले जाईपर्यंत त्यांनी त्याची वाट पाहिली, मात्र तो दिसून आला नाही. तो गर्दीतून घरी गेला असावा, असे वाटल्याने त्या घरी आल्या असता, तो घरीही आलेला नव्हता. त्याच्या मित्रांना विचारणा केली, आजूबाजूला शोधले, नातेवाइकांकडेही शोधले, मात्र तो मिळून आला नाही. त्याला कोणीतरी फूस लावून पळवून नेल्याचे काकूने तक्रारीत म्हटले आहे. अधिक तपास पोलीस अंमलदार असगर शेख करत आहेत.
.jpg)
.jpg)
