सिडको एन २ मध्ये बँक अधिकाऱ्याचे घर फोडून दागिने लंपास!

छत्रपती संभाजीनगर (मेट्रोपोलिस पोस्ट वृत्तसेवा) : सिडको एन २ मधील म्हाडा कॉलनीत बँक अधिकाऱ्याचे घर फोडून चोरट्यांनी सोने, चांदीच्या दागिन्यांसह रोख रक्कम असा एकूण ७१ हजार रुपयांचा ऐवज लंपास केला. ही घटना रविवारी (२३ नोव्‍हेंबर) सकाळी समोर आली.

राजेंद्र विष्णू मगर (वय ५२, रा. खंडाळा, ता. वैजापूर, ह. मु. म्हाडा कॉलनी एन २ सिडको छत्रपती संभाजीनगर) यांनी या प्रकरणात तक्रार दिली आहे. कॉर्पोरेट डी. एस. ए होम लोन या बँकेत खासगी नोकरी करतात. शुक्रवारी (२१ नोव्‍हेंबर) सकाळी सहाला ते कुटुंबासह आईचे वर्षश्राध्द असल्याने मूळ गावी खंडाळा येथे गेले होते. घरातील लोखंडी कपाटात चार ग्रॅम सोन्याची चैन, चार ग्रॅमचे सोन्याचे कानातले व २३ हजार रुपये रोख तपकिरी रंगाच्या पर्समध्ये ठेवलेले होते. रविवारी (२३ नोव्‍हेंबर) सकाळी साडेअकराला मगर यांना शेजाऱ्याने कॉल करून तुमच्या घराचा दरवाजा उघडा दिसत असल्याचे सांगितले.

त्यामुळे मगर हे लगेच खंडाळा येथून छत्रपती संभाजीनगरला आले. दुपारी दीडला घरी आल्यावर त्यांनी पाहिले असता दरवाजाला लावलेले कुलूप दिसून आले नाही. दरवाजा उघडा दिसला. घरात पाहणी केली असता घरातील लोखंडी कपाट उघडे दिसले. त्यातील तपकिरी रंगाची पर्स पलंगावर ठेवलेली दिसली. पर्समधील सोन्याची चैन, कानातले व २३ हजार रुपये दिसून आले नाहीत. चोरट्याने एकूण ७१ हजार रुपयांचा ऐवज चोरून नेल्याचे समोर आले. अधिक तपास पोलीस अंमलदार संजय नंद करत आहेत.