छत्रपती संभाजीनगरमध्ये जामिनाची ऑर्डर देत नाही म्हणून संशयिताच्या पित्याने वकील महिलेला धमकावल्याची तक्रार!

छत्रपती संभाजीनगर (मेट्रोपोलिस पोस्ट वृत्तसेवा) : संशयिताला जामीन मिळवून दिल्यानंतर वकील महिलेसोबत फीवरून वाद झाला. त्यानंतर जामिनाची ऑर्डर देत नाही म्हणून संशयिताच्या पित्याने वकील महिलेसोबत भांडण करत धमक्या दिल्याची तक्रार वकील महिलेने पुंडलिकनगर पोलीस ठाण्यात केली आहे. ही घटना गुरुवारी (११ डिसेंबर) दुपारी चारला उच्च न्यायालयाच्या वकील कक्षात घडली.

ॲड. सुवर्णा मिलिंद झावरे (वय ४५, रा. सिडको एन २) यांच्या तक्रारीवरून भुरसिंह राजपुरोहित (रा. राजस्थान) याच्याविरुद्ध गुन्हा दाखल करण्यात आला आहे. गुरुवारी (११ डिसेंबर) दुपारी ॲड. स्मिता या वकिलांच्या दालनात होत्या. भुरसिंहने त्यांच्याकडे येत जामीन ऑर्डर मागितली. त्यावर केसचे उर्वरित ४५ हजार रुपये जमा करा, असे ॲड. स्मिता म्हणाल्या असता भुरसिंह संतापला. त्याने जीवे मारण्याची धमकी दिली, असे तक्रारीत म्हटले आहे.

काय आहे प्रकरण...
गुजरातचे सोन्याचे व्यापारी विजयसिंह वसनाजी खिशी गेल्या ७ मे रोजी मुंबईतील त्यांच्या होलसेल फर्ममधून सुमारे ४ किलो ८७३ ग्रॅम सोन्याचे दागिने घेऊन शिर्डीत आले होते. त्यांच्यासोबत कामगार चंद्रप्रकाश प्रजापती आणि चालक सुरेशकुमार भुरसिंह राजपुरोहित होते. ते हॉटेल साई सुनीता या हॉटेलमध्ये थांबले होते. १३ मे रोजी रात्री ११ ला त्यांनी जेवण केल्यानंतर रूममध्ये झोप घेतली. दागिन्यांची बॅग बेड आणि टेबलमध्ये ठेवली होती. रूम आतून बंद होती. तिघेही एकाच खोलीत झोपले होते. १४ मे रोजी सकाळी सहाला व्यापारी खिशी यांचा चुलत भाऊ शैलेंद्रसिंह पैसे घेण्यासाठी हॉटेलवर आला. दरवाजा उघडला असता तो उघडाच आढळला. सुरेशकुमार गायब होता. त्याचा मोबाइल फोन आणि कपडे रूममध्येच होते. सुमारे साडेतीन किलो सोन्याचे दागिने (किंमत ३ कोटी २२ लाख) आणि ४ लाख रुपयांची रोकड सुरेशकुमारने चोरून नेली होती. शिर्डी पोलीस ठाण्यात खिशी यांनी तक्रार दिली. त्याला अहिल्यानगरच्या स्थानिक गुन्हे शाखेने अटक केली होती. सुरेशकुमारच्या जामिनासाठी भुरसिंहने ॲड. स्मिता झावरे यांच्याकडे केस सोपवली होती. १० डिसेंबरला सुरेशकुमारला जामीन मंजूर झाला.