‘गांधीनगरीत हिटलरगिरी’: पैशाच्या वादातून घर बळकावण्याचा प्रयत्न, कुटुंबाला धमक्या देत घराबाहेर काढले, चिकलठाण्यातील घटना

छत्रपती संभाजीनगर (मेट्रोपोलिस पोस्ट वृत्तसेवा) : चिकलठाण्यातील गांधीनगरी अपार्टमेंटमध्ये पैशांच्या वादातून एका कुटुंबाला धमक्या देत घराबाहेर काढून देत घराला कुलूप लावल्याचा प्रकार समोर आला आहे. महिलेच्या तक्रारीवरून सिडको एमआयडीसी पोलिसांनी ३ जणांविरुद्ध शुक्रवारी (१२ डिसेंबर) गुन्हा दाखल केला आहे.

अमृता कल्पेश जोशी (वय ४१, रा. गांधीनगरी अपार्टमेंट बेडसे पेपर मिलमागे चिकलठाणा एम.आय.डी.सी.) यांनी या प्रकरणात तक्रार दिली आहे. तक्रारीनुसार, त्या पती कल्पेश जोशी, सासू नैना विलास जोशी व दोन मुलांसह राहतात. शुक्रवारी दुपारी साडेबाराला अमृता व त्यांच्या सासू घरी असताना राजेश रतन गुप्ता (वय ३३, रा. एन ७ सिडको), राजेश गुप्ता याची पत्नी नाव माहीत नाही, शालीकराम ब्रीजलाल जैस्वाल (वय ४०, रा. सिडको एन ५) हे आले. त्यांनी विचारले की, कल्पेश कुठे आहे? त्यावर अमृता यांनी ते आजारी असल्यामुळे सत्यविष्णू हॉस्पिटलमध्ये उपचार घेत असल्याचे सांगितले. त्यावेळी शालीकराम जैस्वाल याने सांगितले की, तुमच्या पतीने माझ्यायाकडून पैसे घेतलेले आहे.

ते मला परत दिलेले नाही. ते कधी देणार? त्यावर अमृता यांनी त्यांना सांगितले, की माझे पती आजारी आहेत. ते आल्यानंतर तुम्ही त्यांच्याशी बोला. अमृता यांनी पतीला कॉल लावून त्यांच्याशी बोलणे करून दिले. कॉलवर त्यांच्या पतीने समजावून सांगितले, मात्र त्यांनी काहीएक ऐकले नाही. तुम्ही माझे पैसे द्या. नाही तर तुमच्या घराला कुलूप लावून तुम्हाला घराबाहेर काढून देईल, असे धमकावले. त्यानंतर अमृता व त्यांच्या सासूला घराबाहेर काढून देत घराला कुलूप लावले आणि निघून गेले. अमृता यांनी सिडको एमआयडीसी पोलीस ठाण्यात येऊन तक्रार दिली. त्यावरून पोलिसांनी गुन्हा दाखल केला आहे. अधिक तपास पोलीस अंमलदार संतोष सोनवणे करत आहेत.