छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगरमधील अवैध आंतरराष्ट्रीय कॉल सेंटरचा सूत्रधार २२ वर्षीय राजवीर प्रदीप शर्मा याला घेऊन शहर पोलिसांचे पथक रविवारी (२ नोव्हेंबर) सकाळी त्याच्या अहमदाबादमधील वल्लभनगरातील घरी धडकले. त्याच्या घराची कसून झडती घेतली. अनेक महत्त्वाची कागदपत्रे हाती लागली आहेत. राजवीर हा मुख्य सूत्रधार असल्याचे समोर येत होते. पण चौकशीत त्याचा काका बलवीर वर्मा ऊर्फ पाजी हा मास्टरमाइंड असल्याचे समोर आले आहे. त्याने पुतण्याकडे रॅकेटची सूत्रे सोपवली होती. बलवीरचा शोध गुजरातमध्ये घेतला जात असल्याचे पोलिसांनी सांगितले.
कॉल सेंटर उभारून अमेरिकन नागरिकांना लुबाडण्याची शक्कल जॉन नावाच्या व्यक्तीने लढवली. त्याने बलवीरला हाताशी धरले. बलवीरने कटाला मूर्त रुप देण्याची जबाबदारी राजवीरकडे सोपवली. सोबत विश्वासू माणसेही दिली. जॉन हा कोण आहे, हे अद्यापही समोर आलेले नाही. साखळी बलवीरपर्यंत पोहोचली आहे. ४५ टक्के जॉनचे, तर ५५ टक्के बलवीरचे अशी वाटणी व्हायची. मुख्य संशयितांपैकी एक असलेल्या अब्दुल फारुक मुकदम शाह ऊर्फ फारुकी याला गोव्यावरून पकडून आणल्यानंतर त्याने कसून चौकशीत तोंड उघडले होते. त्याने राजवीरचे नाव सांगितल्यानंतर पोलीसही चक्रावले होते.
कारण ज्या ११४ कर्मचारी तरुण-तरुणींना पोलिसांनी पकडून न्यायालयीन कोठडीत रवानगी केली होती, त्यात एक राजवीर होता. त्याला हर्सूल तुरुंगातून ताब्यात घेऊन पोलिसांनी पोलीस कोठडी मिळवली आणि चौकशी सुरू केली आहे. पोलिसांना राजवीरच्या रूमची झडती घेताना त्याच्या लॅपटॉपमध्ये अमेरिकन प्रशासकीय अधिकाऱ्यांचे बनावट ओळखपत्र, न्यायालयीन आदेशांची बनावट कागदपत्रे, अमेरिकन नागरिकांची नावे व डेटा मिळाला होता. या कॉल सेंटरमध्ये राजवीर आणि बलवीरने २५ ते ३० कोटी रुपयांची गुंतवणूक केली होती. बलवीर-राजवीरचे नातेवाईक मोहाली, अहमदाबाद, मुंबई व परदेशात राहतात. त्यांच्याकडून या काका-पुतण्याला मदत मिळत असावी, असाही संशय पोलिसांना आहे. या संशयाला फारुकीनेही दुजोरा दिला आहे.
दरम्यान, रॅकेटमधील मुख्य संशयित फारुकीसह मनवर्धन राठोड, सतीश लाडे यांची पोलीस उपायुक्त प्रशांत स्वामी, वरिष्ठ पोलीस निरीक्षक गीता बागवडे यांनी रविवारीही सिडको एमआयडीसी पोलीस ठाण्यात चार तासांहून अधिक काळ कसून चौकशी केली. कॉल सेंटरमधून जप्त केलेले लॅपटॉप, मोबाईल हे फॉरेन्सिक लॅबकमध्ये तपासणीसाठी पाठविण्यात आले आहे. वरिष्ठ पोलीस निरीक्षक गीता बागवडे, सहायक पोलीस उपनिरीक्षक मोहसीन सय्यद, अमोल म्हस्के, पोलीस उपनिरीक्षक उत्तरेश्वर मुंडे, छाया लांडगे, लालखान पठाण तपास करत आहेत.
अमेरिकन नागरिकांना असे लुटायचे...
चिकलठाणा एमआयडीसीतील आयटी पार्कमध्ये आयआरएस इंटर्नल रेव्हेन्यू सर्व्हिस इन्व्हेस्टिगेशन डिपार्टमेंट नावाने सायबर गुन्हेगारांनी अवैध आंतरराष्ट्रीय कॉल सेंटर उघडले होते. त्यावर सिडको एमआयडीसी पोलिसांनी मंगळवारी (२८ ऑक्टोबर) छापा मारून ११६ तरुण-तरुणींना ताब्यात घेतले होते. त्यांच्याकडून ११९ लॅपटॉप व मोबाइलसह अन्य तांत्रिक, डिजिटल साधने असा कोट्यवधी रुपयांचा मुद्देमाल जप्त केला होता. या कॉल सेंटरमधून अमेरिकेन नागरिकांना कॉल, मेसेज करून करचुकवल्याबद्दल भीती दाखवून किंवा वेगवेगळ्या योजनांची आमिषे दाखवून कोट्यवधी रुपयांनी गंडवले जात होते.
