बलात्‍कार पीडितेचा आधी कारने अपघात घडवला, नंतर कोर्ट आवारात वकिलाने दिली धमकी!; वेदांतनगर पोलिसांनी केला दोघांविरुद्ध गुन्हा दाखल

छत्रपती संभाजीनगर (सीएससीएन वृत्तसेवा) : कोर्टात तारिख असल्याने महिला पोलीस अंमलदारांसोबत स्कुटीने कोर्टात येणाऱ्या २७ वर्षीय बलात्कारपीडित तरुणीचा आधी कारने अपघात घडवला. नंतर कोर्ट आवारात वकिलाने जीवे मारण्याची धमकी दिल्याचा प्रकार समोर आला आहे. तरुणीच्या तक्रारीवरून वेदांतनगर पोलिसांनी कारचालक आणि वकिलाविरुद्ध सोमवारी (२५ ऑगस्ट) गुन्हा दाखल केला आहे.

सध्या जयभवानीनगरात राहत असलेल्या व मूळची पाचोरा (जि. जळगाव) येथील असलेल्या तरुणीने ॲड. महेंद्र भगवान नैनाव याच्याविरुद्ध सिडको पोलीस ठाण्यात बलात्‍काराचा गुन्हा दाखल केला आहे. सिडको पोलिसांनी अद्याप महेंद्रला अटक न केल्याने जिवाला धोका असल्याची तक्रार तिने पोलीस आयुक्‍तांकडे केली होती. त्‍यानंतर तिला पोलीस संरक्षण पुरविण्यात आले आहे. सेशन कोर्टात तारिख असल्याने पोलीस मुख्यालयातील महिला पोलीस अंमलदार पद्‌मा रामराव शहाणे यांच्यासह तरुणी १३ ऑगस्टला स्कुटीवरून सेशन कोर्टाजवळ दुपारी एकच्या सुमारास आली. कोर्टाजवळच एक नेक्सा कारने (MH 20 GK 8983) भरधाव पुढे येऊन अचानक ब्रेक मारले. कारमागे स्कुटी असल्याने दोघीही गाडीवरून पडल्या व मार लागला.

नेक्सा कारचालकाने काय करायचे ते करा, असे म्हणून निघून गेला. त्यानंतर पीडित तरुणी आणि पोलीस अंमलदार शहाणे या सेशन कोर्टात तारखेसाठी कोर्टात गेल्या असता ॲड. संतोष सरताळे यांनीही तरुणीला धमकी दिली. आज तुमचा अपघात केला. तुझी केस मागे घे, अन्यथा तुला जीवे मारू, अशी धमकी दिली, असे तक्रारीत तरुणीने म्हटले असून, नेक्सा कारचालक व ॲड. सरताळेविरुद्ध तक्रार दिली. त्यावरून पोलिसांनी दोघांविरुद्ध गुन्हा दाखल केला आहे. अधिक तपास पोलीस अंमलदार वर्षा मुंढे करत आहेत.