निमोने कुटुंबाला खुनाच्या खेदाचा लवलेशही नाही!; पाडसवान हत्‍या प्रकरण : ठाकरे गटाचा शाखाध्यक्ष अरुण गव्हाड, निमोनेचा मित्र मंगेश वाघला अटक, जयश्री दानवे सापडेना!

छत्रपती संभाजीनगर (सीएससीएन वृत्तसेवा) : सिडको एन ६ मधील संभाजी कॉलनीत प्रमोद रमेश पाडसवान (वय ३८) यांच्या हत्‍येप्रकरणी पोलिसांनी शिवराज मंडळाचा संस्थापक अध्यक्ष तथा शिवसेनेच्या ठाकरे गटाचा शाखा प्रमुख अरुण गव्हाड व मंडळाचा सदस्य, निमोनेचा मित्र मंगेश वाघ या दोघांना सोमवारी (२५ ऑगस्ट) रात्री उशिरा अटक केली. हत्येसाठी चिथावणी देण्यासह दंगलसदृश घटना घडवल्याचा आरोप त्यांच्यावर पोलिसांनी लावला आहे. मंगळवारी (२६ ऑगस्ट) त्‍यांना न्यायालयात हजर केले असता दोघांनाही ३० ऑगस्टपर्यंत पोलीस कोठडी सुनावण्यात आली. निमोनेची बहीण जयश्री मनोज दानवे अजूनही पोलिसांना मिळून आली नाही. तिचा शोध पोलीस कसोशीने घेत आहेत.

ज्ञानेश्वर काशीनाथ निमोने, त्याची आई शशिकला व लहान भाऊ गौरव, सौरभ, जावई मनोज, वडील काशीनाथ यांची पोलीस कोठडीत कसून चौकशी केली जात आहे. या आरोपींना केलेल्या गुन्ह्याचे कोणतेही गांभीर्य नसून, पोलीस चौकशी करतात तेव्हा ते सहज अन्‌ हसत उत्तरे देत असतात. हल्ला आणि खुनाच्या खेदाचा लवलेशही त्‍यांच्या चेहऱ्यावर नसतो, असे पोलीस सूत्रांनी सांगितले. त्‍यामुळे पूर्वनियोजित ही घटना असल्याची शक्‍यता पोलिसांना वाटत आहे. पोलिसांनी निमोनेची दोन्ही चारचाकी वाहने जप्त केले आहेत. 

घटनेच्या सीसीटीव्ही फूटेजमध्ये एकूण २७ लोक दिसत असून, त्‍या सर्वांची पडताळणी पोलीस करणार आहेत. त्‍यातील काही जणांना साक्षीदार तर काहींना आरोपी केले जाऊ शकते. प्रत्‍येकाची भूमिका काय होती, याचे विश्लेषण केले जाणार आहे. हल्ल्यापूर्वी पाडसवान यांनी तब्‍बल ३० तक्रारी दिलेल्या असल्याने हल्लेखोरांचा उद्देश स्पष्ट होत असून, सीसीटीव्ही फूटेजमध्ये सर्व हल्लेखोर कैद झालेले आहेत. हल्ला आणि खून केल्यानंतर ते स्वतःच आधी पोलीस ठाणे आणि नंतर रुग्णालयात दाखल झाले, जेणेकरून परस्परविरोधी तक्रार करता येईल. सकाळी वादानंतर निमोने कुटुंब घरी गेले अन्‌ काही वेळाने तयारीनिशी पुन्हा हल्ला केला. या सर्व बाबी पोलिसांनी तपासास्थानी घेतल्या आहेत.

अरुण अन् मंगेशची भूमिका काय?
हल्लेखोर निमोने कुटुंबाला अरुण गव्हाण, मंगेश वाघने चिथावणी दिल्याचे समोर आले आहे. अरुणचे परिसरात किराणा दुकान आहे, तर मंगेश जवळच्याच रुग्णालयात नर्सिंगचे शिक्षण घेतो. घटनेनंतर लगेचच पोलिसनी पूर्ण निमोने कुटुंब अटक केले. मात्र निमोनेची बहीण जयश्री बाहेर होती. न्यायालयात येऊन तिने भावांची भेट घेतली, त्यावेळी आमच्यावरही हल्ला झाल्याची तक्रार देण्याचा तिचा इरादा होता. मात्र पोलिसांनी त्याआधीच अरुण, मंगेशसह जयश्रीला आरोपीला केले. त्यामुळे जयश्रीला पलायन करावे लागले. ती अजून पोलिसांच्या हाती लागली नाही.