छत्रपती संभाजीनगर (मेट्रोपोलिस पोस्ट वृत्तसेवा) : सध्या दिवाळी एसटी महामंडळाच्या बसेसमध्ये गर्दी होत आहे. त्यामुळे एसटी वाहक-चालकांवर कामाचा ताण आला आहे. मात्र हा ताण ते प्रवाशांवर काढत असल्याची धक्कादायक घटना छत्रपती संभाजीनगरमध्ये समोर आली आहे. शिर्डीवरून निघालेल्या बसमध्ये चढतानाच आधी वाहक महिलेने एका वृद्धेला अरेरावी करत मारहाण केली. ही बाब वृद्धेने त्यांच्या लेकाला कळवल्यानंतर त्यांनी मध्यवर्ती बसस्थानकात बस येताच अडवून या वाहक महिलेला चांगलेच धारेवर धरले. विशेष म्हणजे, चोरावर मोर होत या वाहक महिलेने सरकारी कामात अडथळा आणल्याचा गुन्हा ६० वर्षीय वृद्धेसह त्यांच्या लेकाविरुद्ध दाखल केल्याने संताप व्यक्त होत आहे. ही घटना गुरुवारी (१६ ऑक्टोबर) सायंकाळी साडेसहाच्या सुमारास घडली. सध्याच्या दिवाळीच्या सिझनमध्ये एसटी वाहक-चालकांची वागणूक सुधारण्याच्या सूचना वरिष्ठांनी कराव्यात, अशी मागणी प्रवाशांकडून होत आहे.
एसटी बस वाहक क्रांती नीलेश धायडे (वय ३२, रा. कमळापूर, वाळूज एमआयडीसी परिसर) असे वृद्धेला अरेरावी, मारहाण करणाऱ्या वाहक महिलेचे नाव आहे. त्या गंगापूर डेपोत कार्यरत असल्याचे समोर येत आहे. चोरावर मोर होत त्यांनी केलेल्या तक्रारीमुळे क्रांती चौक पोलीस ठाण्यात वृद्ध महिला अलका श्रीकांत कोलते आणि योगेश श्रीकांत कोलते (वय ४६, रा. पिसादेवी, छत्रपती संभाजीनगर, मूळ रा. भालगाव, ता. फुलंब्री) यांच्याविरुद्ध गुन्हा दाखल करण्यात आला आहे. या एसटी बसमधील अन्य प्रवाशांच्या आरोपानुसार, वाहक महिलेनेच आधी वृद्धेला शिवीगाळ केली. झटापट करत मारहाण केली. अन्य प्रवाशांसोबतही त्यांचे वर्तन चुकीचे होते. अनेकांना त्या वय न पाहता अरेरावी करत होत्या.
नक्की काय घडलं ?गुरुवारी (१६ ऑक्टोबर) सकाळी शिर्डीला जाणाऱ्या बसवर क्रांती धायडे या महिला वाहकाची ड्युटी होती. दुपारी २ वाजता बस शिर्डी येथे पोहोचली. एकीकडे प्रवाशी उतरत असताना, बसमध्ये बसण्यासाठी प्रवाशीही प्रयत्न करत होते. यात अलका कोलते ही वृद्ध महिलाही होती. महिला वाहकाने त्यांना अरेरावी करत प्रवाशांना आधी खाली उतरू दे, मग चढ, असे म्हटले. त्यावर दोघींत वाद झाला. एकमेकींना शिवीगाळ आणि किरकोळ मारहाणही झाली. वृद्धेने अंगातील शर्ट ओढल्याचे क्रांती यांचे म्हणणे आहे. अलका या बसमध्ये बसल्यानंतरही दोघींत वादावादी सुरूच होती.
अलका यांनी दुसऱ्या प्रवाशाच्या मोबाइलवरून त्यांचा मुलगा योगेश यांना कॉल करून बोलावून घेतले. यावेळी कॉलवर बोलताना त्यांनी महिला वाहकाने मारहाण केल्याचेही सांगितले. त्यामुळे योगेश संतप्त झाले. बस छत्रपती संभाजीनगर येथे मध्यवर्ती बसस्थानकावर आली तेव्हा योगेश आधीच येऊन थांबले होते. त्यांनी बसस्थानकात बस शिरत असतानाच अडवली. महिला वाहकाला खाली बोलावून शिवीगाळ केली. तू माझ्या आईला का मारले, असे म्हणून जाब विचारला. यावेळी महिला वाहक मात्र ऐकण्यास तयार नसल्याने संतप्त होऊन ते महिला वाहकावर कारवाईसाठी बसच्या टायरखाली झोपले. बराच वेळ हा गोंधळ सुरू होता. त्यामुळे मोठी गर्दी जमली होती. घटनेचा अधिक तपास सहायक पोलीस उपनिरीक्षक रमेश कांदे करत आहेत.
.jpg)
.jpg)
.jpg)
