पित्‍यानेच ८ महिन्यांच्या बाळाला घेतले चावे!, नारेगावची धक्कादायक घटना

छत्रपती संभाजीनगर (सीएससीएन वृत्तसेवा) : पत्‍नीने दारू पिण्यास विरोध केल्याने संतप्त पतीने घरात कुणी नसल्याचे पाहून त्‍याच्या ८ वर्षांच्या मुलाला चावे घेतल्याची धक्कादायक घटना छत्रपती संभाजीनगरच्या नारेगावमध्ये समोर आल्याने खळबळ उडाली आहे. सिडको एमआयडीसी पोलिसांनी या विकृत पित्‍याविरुद्ध शुक्रवारी (२९ ऑगस्ट गुन्हा दाखल केला आहे.

नारेगावच्या फातेमा मशिदीजवळ पती, एक मुलगी, दोन मुलांसह राहणाऱ्या २१ वर्षीय विवाहितेने या प्रकरणात तक्रार दिली आहे.  तिचा पती प्लंबर असून, दारूडा आहे. गुरुवारी (२८ ऑगस्ट) पती-पत्‍नीमध्ये दारू पिण्यावरून वाद झाला. त्यानंतर विवाहिता आईकडे निघून गेली. मोठी मुलगी आणि मोठा मुलगाही आईकडे गेलेला असल्याने त्‍यांच्यासोबत ती रात्री आठला घरी परतली. ८ महिन्यांचे लहान बाळ सतत रडत असल्याने तिने जवळ घेतले. त्याच्या पाठीवर हात लागला, तसे ते आणखी जोरात रडू लागले.

त्‍यामुळे तिने त्याचा शर्ट काढून पाहिला असता त्याच्या पाठीवर व डाव्या पायाच्या मांडीवर चावल्याच्या खुना दिसल्या. त्यावेळी तिने पतीला याबाबत विचारले असता त्याने सांगितले, की तू मला दारू पिण्याबाबत का बोलली? त्याचा राग मनात धरून मीच त्याला दाताने चावे घेतले आहेत. त्याला जीवंत सोडणार नाही. तू माझ्याविरुध्द पोलिसांत तक्रार केली तर मी तुलाही मारून टाकेन, अशी धमकी दिली. त्यानंतर विवाहितेने चिमुकल्या मुलाला घेऊन सिडको एमआयडीसी पोलीस ठाणे गाठले. चिकलठाणा येथील मिनी घाटी रुग्णालयात मुलावर उपचार करण्यात येत आहेत. अधिक तपास पोलीस अंमलदार राजू कोतवाल करत आहेत.