चिकलठाण्यात खून!; खाणावळीतच मित्राचे मित्रावर चाकूने सपासप वार

छत्रपती संभाजीनगर (सीएससीएन वृत्तसेवा) : चिकलठाणा पोलीस ठाण्याच्या हद्दीतील गेवराई तांडा येथील खंडेवाडी रोडवरील वाणी यांच्या खाणावळीत मित्रानेच मित्राचा चाकूने भोसकून खून केला. ही धक्कादायक घटना गुरुवारी (२८ ऑगस्ट) रात्री १० वाजता घडली. दीपक दत्ता कांबळे (वय २२, ह. मु. शिवकृपा कॉलनी, गेवराई तांडा, मूळ रा. पैठणखेडा, ता. पैठण) असे मृत्‍यू झालेल्याचे नाव आहे.

संशयित रवींद्र सुभाष बोर्डे (वय ३२, रा. शेंद्रा कमगर, ता. छत्रपती संभाजीनगर) याला चिकलठाणा पोलिसांनी शुक्रवारी (२९ ऑगस्ट) अटक केली आहे. दीपक मजुरी करत होता. वाणी यांच्या खाणावळीत नेहमी जेवायला येत होता. तिथेच त्याची रवींद्र बोर्डेसोबत मैत्री झाली. गुरुवारी रात्री खानावळीत त्यांच्यात कशावरून तरी वाद झाला. वादाचे रुपांतर हाणामारीत झाले. रवींद्रने छोट्या आकाराच्या चाकूने दीपकच्या छातीत सपासप वार केले. वार थेट हृदयात लागल्याने दीपक जागीच गतप्राण झाला.

माहिती मिळताच पोलीस निरीक्षक रवीकिरण दरवडे, पोलीस उपनिरीक्षक उत्तम नागरगोजे यांनी घटनास्थळी धाव घेतली. रवींद्रला ताब्यात घेतले. उपविभागीय पोलीस अधिकारी पूजा नागरे यांनीदेखील घटनास्थळी भेट देऊन पाहणी केली. दीपकच्या पश्चात आई-वडील, तीन भाऊ, दोन बहिणी असा परिवार आहे. पोलिसांनी चाकू जप्त केला आहे. बोर्डेविरुद्ध यापूर्वी चिकलठाणा पोलीस ठाण्यात विवाहितेचा छळ व बँकेशी संबंधित दोन गुन्हे दाखल आहेत. दीपकचा मावस भाऊ संदीप साबळे यांच्या तक्रारीवरून रवींद्रविरुद्ध खुनाचा गुन्हा दाखल करण्यात करण्यात आला. रवींद्र आणि दीपकमध्ये नक्की कोणत्या कारणावरून इतक्या टोकाचा वाद झाला, याची चौकशी पोलीस करत आहेत.