बाबा पेट्रोलपंप चौकात पोलिसांनी युसूफची काढली धिंड!; थेट वाहतूक पोलिसाला जीवे मारण्याचा प्रयत्‍न झाल्याने आक्रमक पोलिसांची चौकाचौकात कारवाई, ७९७ रिक्षांना दंड, ३२ रिक्षा जप्त

छत्रपती संभाजीनगर (मेट्रोपोलिस पोस्ट वृत्तसेवा) : बाबा पेट्रोलपंप चौकात वाहतूक पोलीस अंमलदार तुकाराम टाकसाळे यांच्या अंगावर रिक्षा घालणारा गुन्हेगारी प्रवृत्तीचा चालक युसूफ मोहंमद अन्सारी (रा. मोमीनपुरा, दौलताबाद) याला शहर गुन्हे शाखेच्या पथकाने अटक केली. त्यानंतर ज्या ठिकाणी त्याने रिक्षा अंगावर घातली, तिथूनच त्याची सोमवारी (२४ नोव्हेंबर) रात्री धिंड काढण्यात आली. त्याला वेदांतनगर पोलिसांनी न्यायालयात हजर केले असता न्यायालयाने दोन दिवसांची पोलीस कोठडी सुनावली.

वाहतूक पोलिसावर झालेल्या हल्ल्यामुळे शहर पोलीस नियमबाह्य वागणाऱ्या आणि गुन्हेगारी प्रवृत्तीच्या रिक्षाचालकांविरुद्ध आक्रमक झाले आहेत. दिवसभर प्रत्येक चौकात विशेष मोहीम राबवून एकूण ७९७ रिक्षांवर कारवाई करण्यात आली. कारवाईत ३२ रिक्षा जप्त करण्यात आल्या. ३ लाख ६७ हजार रुपयांचा दंड वसूल करण्यात आला. पोलीस चौकाचौकात रस्त्यात उतरल्याने प्रत्येक चौकाला जणू छावणीचे रुप आले होते. यापुढेही कारवाई सतत सुरू राहणार असल्याचे वाहतूक शाखेचे सहायक पोलीस आयुक्त सुभाष भुजंग यांनी सांगितले. ११ ऑगस्टला जेव्हा युसूफने महिला प्रवाशाचा विनयभंग केला होता, तेव्हा वेदांतनगर पोलिसांनी त्याची रिक्षा (एमएच २० ईके ४६३२) जप्त केली होती. दोन महिने रिक्षा पोलिसांच्या ताब्यात होती. मात्र दीड महिन्यापूर्वीच दंड भरून त्याने रिक्षा सोडवून घेतली आणि रविवारी (२३ नोव्‍हेंबर) थेट वाहतूक पोलिसाला त्याच रिक्षाने जीवे मारण्याचा प्रयत्न केला.

बाबा पेट्रोलपंप चौकात काय घडलं?
बाबा पेट्रोलपंप सिग्नलवर असताना पोलीस अंमलदार तुकाराम टाकसाळे सहकाऱ्यांसह तैनात असताना दुपारी १ च्या सुमारास सेशन कोर्टाकडून बाबापेट्रोलपंप सिग्नलवरून रेल्वस्टेशनकडे जाणाऱ्या रोडवर युसूफ रिक्षात (एमएच २० इके ४६३२) प्रवासी भरत होता. त्याने गणवेश परिधान केला नसल्याने टाकसाळे यांनी त्याला थांबण्याचा इशारा केला. त्यामुळे संतापलेल्या युसूफने रिक्षा वेगात त्यांच्या अंगावर घातली आणि २० फूट फरपटत नेले. यात टाकसाळे यांना गंभीर दुखापत झाली आहे. त्यानंतर तो रिक्षा घेऊन सुसाट पळून गेला. ही रिक्षा युसूफचा भाऊ मोहम्मद इब्राहिम मोहम्मद अली अन्सारी याची असल्याचे समोर आले. वेदांतनगर पोलिसांनी युसूफ मोहम्मद अली अन्सारी (वय २७) आणि रिक्षामालक मोहम्मद इब्राहिम अली अन्सारी (दोघे रा. मोमीनपुरा मशिदीजवळ, दौलताबाद) या दोघांविरुद्ध गुन्हा दाखल केला आहे. यापूर्वीही युसूफने रेल्वेस्थानकाजवळ ११ ऑगस्टला सायंकाळी सहाला कामगार कल्याण कार्यालयातील वर्ग २ च्या अधिकारी असलेल्या महिलेकडे जास्तीचे पैसे मागून शिवीगाळ, धमक्या देत विनयभंग केला होता. त्याला आवरण्यासाठी आलेल्या दोन वाहतूक पोलिसांना त्याने धक्काबुक्की करत त्यांच्या हातातील चालान मशीन फेकून दिले होते. त्यावेळी अटक झाल्यानंतर दुसऱ्याच दिवशी जामीन झाला होता. त्यामुळे त्याची हिंमत वाढली होती.