छत्रपती संभाजीनगर (मेट्रोपोलिस पोस्ट वृत्तसेवा) : मेट्रोमनी साईट्सवरून होणाऱ्या फसवणुकीवर छत्रपती संभाजीनगरातील घटनेने प्रकाश टाकला आहे. हर्सूल भागात राहणाऱ्या २८ वर्षीय तरुणीच्या पायाखालची जमीन सरकली असून, ‘जीवनसाथी डॉट कॉम’वरून ओळख झालेल्या तरुणाने लग्नाच्या आमिषाने तिच्याकडे नग्न फोटो मागितले. लैंगिक सुखाची मागणी केली. विशेष म्हणजे, तो विवाहित असूनही अविवाहित सांगून हे सर्व करत होता. एकेदिवशी त्याच्या पत्नीचा कॉल तरुणीला आल्यानंतर त्याचे बिंग फुटले. हर्सूल पोलिसांनी या भामट्याविरुद्ध मंगळवारी (२५ नोव्हेंबर) गुन्हा दाखल केला आहे.
हर्सूल भागात भागात राहणाऱ्या २८ वर्षीय पूजाने (नाव बदलले आहे) या प्रकरणात तक्रार दिली आहे. ती एमए झालेली आहे. सध्या नोकरीच्या शोधात आहे. गेल्या १३ ऑक्टोबरला सायंकाळी सहाला ती मोबाइलमधील जीवनसाथी डॉट कॉम ॲप बघत होती. तिच्या अकाउंटवर अनुप सावदेकर या नावाने रिक्वेस्ट आली. तिने रिक्वेस्ट स्वीकारल्याने दोघांत ओळख झाली. अनुपने सांगितले, की सध्या मी जम्मू येथे भारतीय सेनेत शिपाई असून अविवाहित आहे आणि लग्न करण्यास इच्छुक आहे. त्यामुळे पूजाने तिच्या आई-वडिलांचे मोबाइल नंबर त्याला दिले.
नंतर त्याने तिच्या वडिलांना कॉल करून सांगितले, की तुमची मुलगी मला आवडलेली आहे. तुम्ही दुसरीकडे स्थळ पाहू नका. मी डिसेंबर २०२५ मध्ये छत्रपती संभाजीनगरला येणार आहे. तेव्हा आपण कोर्ट मॅरेज करू. त्याच्या बोलण्यावर पूजा व तिच्या आई-वडिलांनी विश्वास ठेवला. पूजा व अनुप एकमेकांशी फोनवर बोलू लागले. काही दिवसांनी जवळीक वाढून दोघांचे जास्तच बोलू होऊ लागले. एकेदिवशी तो कॉलवर म्हणाला, की मी तुझा होणारा पती आहे. तर तू मला तुझे नग्न फोटो व्हाटस ॲपवर पाठव, असे म्हणून त्याने लैंगिक सुखाची मागणी केली.
त्यावर पूजाने त्याला सांगितले, की मी तुम्हाला लग्नाआधी असे नग्न फोटो पाठवू शकत नाही. त्यानंतरही अनुपने तिला नग्न फोटोंसाठी पाच-सहा वेळा मागणी केली. मात्र पूजाने विरोध केला. १९ नोव्हेंबरला दुपारी ३ ला एका महिलेचा कॉल पूजाला आला. ती म्हणाली, की तू माझा पती अनुप उर्फ मिलींद गजानन वानखेडे याच्यासोबत का बोलतेय? त्यावेळी पूजाला कळले, की त्याचे नाव अनुप सावदेकर नसून अनुप उर्फ मिलींद गजानन वानखेडे (वय २९) आहे. त्याचे रो लग्न झालेले आहे. त्याने पूजा व तिच्या आई- वडिलांचा विश्वास संपादन करून पूजासोबत लग्नाची व लैंगिक सुखाची मागणी करत विश्वासघात केला व फसवणूक केली. अधिक तपास पोलीस उपनिरीक्षक सचिन पागोटे करत आहेत.
