रेल्वेस्टेशनजवळील हॉटेल न्यू पंजाबच्या मालकावर जीवघेणा हल्ला!

By City News Desk

On 03 Aug 2025

रेल्वेस्टेशनजवळील हॉटेल न्यू पंजाबच्या मालकावर जीवघेणा हल्ला!

छत्रपती संभाजीनगर (सीएससीएन वृत्तसेवा) : रेल्वेस्टेशनजवळील हॉटेल न्यू पंजाबचे मालक रोहित सुनिल राठोड (वय ३५, रा. जालाननगर रेल्वेस्टेशन परिसर) यांच्यावर शुक्रवारी (१ ऑगस्ट) पहाटे सव्वा बाराच्या सुमारास क्षुल्लक कारणावरून दोघांनी जीवघेणा हल्ला केला. यात राठोड गंभीर जखमी झाले असून, त्‍यांच्यावर खासगी रुग्णालयात उपचार सुरू आहेत. वेदांतनगर पोलिसांनी दोन हल्लेखोरांविरुद्ध गुन्हा दाखल केला आहे.

रोहित राठोड हे २७ जुलैला मध्यरात्री १२ ला हॉटेल बंद करून कारने पहाटे १२ वाजून १० मिनिटांनी (मध्यरात्री) घरी जाण्यासाठी निघाले. रेल्वस्टेशन उड्डाणपुलाजवळ एक ऑटोरिक्षा विरुध्द दिशेने आली. त्यावर राठोड यांनी रिक्षाचालकाला रिक्षा मागे घ्यायला सांगितली. त्याने रिक्षा मागे न घेता राठोड यांच्यासोबत वाद सुरू केला. रिक्षात दोन अनोळखी व्यक्‍ती होते. त्यांनीही राठोड यांच्यासोबत बाचाबाची सुरू केली. त्‍यातील दोघांनी राठोड यांना मारहाण सुरू केली. त्‍यांच्या नाक, डोळे, ओठ, तोंडावर जबर मारहाण केली. झटापटीत राठोड यांचे सात हजार रुपये पडले. राठोड यांना कुटुंबीयांनी आधी घाटी रुग्णालयात व नंतर सिटीकेअर रुग्णालयात दाखल केले. अधिक तपास सहायक पोलीस उपनिरीक्षक विश्वनाथ पाठे करत आहेत.