हॉटेलमध्ये जेवण करून घरी परतताना भरधाव वाहनाने दुचाकीला ठोकरले, पेट्रोलपंप कर्मचाऱ्याचा जागीच मृत्‍यू, छत्रपती संभाजीनगरची घटना, मित्र गंभीर जखमी

छत्रपती संभाजीनगर (सीएससीएन वृत्तसेवा) : हॉटेलमध्ये जेवण करून घरी निघालेल्या दोन मित्राच्या दुचाकीला अज्ञात वाहनाने ठोकरले. यात २५ वर्षीय तरुणाचा जागीच मृत्‍यू झाला, तर त्‍याचा मित्र तरुण गंभीर जखमी झाला. ही घटना शुक्रवारी (१९ जुलै) पहाटे दोनच्या सुमारास (मध्यरात्री) सावंगी बायपासवरील नारेगावजवळ (कचरा डेपोजवळ) घडला.

रामेश्वर एकनाथ पाले (वय २५) असे मृत्‍यू झालेल्याचे नाव असून, तो खुलताबाद तालुक्‍यातील बाजारसावंगीजवळील शेखपूरचा मूळचा आहे. ५ वर्षांपासून पिसादेवी भागात राहून तो पेट्रोलपंपावर नोकरी करत होता. विनोद तुळशीराम फटाकडे (वय २५, रा. शेखपूर) असे गंभीर जखमीचे नाव आहे. रामेश्वर गुरुवारी सुटी असल्याने गावी गेला होता. त्याला मित्र विनोद भेटला. रात्री दोघांनी हॉटेलमध्ये जेवण केले. त्यानंतर ते रूमला जाण्यासाठी दुचाकीने सावंगी बायपासने निघाले होते.

नारेगाव कचरा डेपोजवळ दोघांना अज्ञात वाहनाने समोरून धडक दिली. यात दोघेही गंभीर जखमी झाले. नागरिकांनी पोलिसांच्या मदतीने त्यांना घाटी रुग्णालयात दाखल केले. डॉक्टरांनी रामेश्वरला तपासून मृत घोषित केले. विनोदला खासगी रुग्णालयात हलविण्यात आले. त्याच्यावर उपचार सुरू आहेत. या अपघाताची नोंद सिडको एमआयडीसी पोलिसांनी केली आहे. रामेश्वरचे वडील अल्पभूधारक शेतकरी आहेत. त्याला एक लहान भाऊ आहे. घरची परिस्थिती बेताची असल्याने तो पेट्रोलपंपावर काम करून कुटुंबाचा उदरनिर्वाह करत होता.