छत्रपती संभाजीनगर (सीएससीएन वृत्तसेवा) : अभ्यासिकेतून घरी परतणाऱ्या विद्यार्थ्याला चौघांनी मारहाण करत लुटले. त्याचवेळी तिथून जाणाऱ्या शेजारील व्यक्तीने विद्यार्थ्याच्या मदतीसाठी धाव घेतली असता लुटारू पळू लागले. त्यांचा सिनेस्टाइल पाठलाग करून वेदांतनगर पोलिसांनी दोघांच्या मुसक्या आवळल्या. दोघे पसार झाले. ३ लुटारू वैजापूरचे तर १ छत्रपती संभाजीनगरचा निघाला. ही घटना मंगळवारी (२० ऑगस्ट) रात्री रेल्वेस्टेशन परिसरातील MTDC कार्यालयाजवळ घडली.
शुभम सर्जेराव मनोरे (वय २३, रा. राजीवनगर जहागीरदार कॉलनी रेल्वेस्टेशन परिसर) याने या प्रकरणात तक्रार दिली आहे. तो आई, वडील, दोन भाऊ व बहिणीसह राहतो.तो MPSC ची तयारी करतो. रेल्वेस्टेशन परिसरातील विट्स हॉटेलसमोरील श्री अभ्यासिकेत मंगळवारी (२० ऑगस्ट) सायंकाळी पाचला तो गेला. रात्री ८ ला तो घरी जाण्यासाठी बाहेर पडला. MTDC कार्यालयासमोरून पायी जात असताना कार्यालयाच्या भिंतीलगत अंधारात उभे चौघे वय अंदाजे १८ ते २० वर्षे हे शुभमकडे आले. त्याला दारू पिण्यासाठी पैशाची मागणी करू लागले.
शुभमने नकार दिला असता त्यातील एकाने हातातील स्टीलच्या कड्याने शुभमच्या डोक्यात व कपाळावर मारले. त्यामुळे शुभमचे डोके फुटले. नंतर त्यांनी त्याचा मोबाइल हिसकावून घेतला, पॅन्टच्या मागील खिशातील दोनशे रुपये काढून घेतले. शिवीगाळ करून हाताचापटाने शुभमला मारहाण करत असताना त्याचवेळी तिथून मनोज भालेराव हे शुभमचे शेजारील रहिवासी जात होते. त्यांनी शुभमकडे धाव घेतली असता चारही लुटारू कोकणवाडीच्या दिशेने पळून गेले. त्यानंतर मनोज भालेराव यांच्या कारमधून त्यांचा पाठलाग करत असताना मनोज भालेराव यांनी पोलिसांनाही कळवले. पाठलाग करत असताना ते चौघे राणा हाॅटेल, फायरब्रिगेडसमोर रेल्वेस्टेशन रोड या ठिकाणी पोहचले.
त्याठिकाणी पोलीससुध्दा पोहचले. शुभमने अंगुली निर्देश करताच पोलिसांनी लुटारूंवर झडप घातली. पोलीस त्यांना पकडत असताना त्यातील दोघे पसार झाले, दोघांना पोलिसांनी पकडले. धम्मदिप संदिप गायकवाड (रा. केसरसिंगपुरा कोकणवाडी), रुद्राक्ष संदिप त्रिभुवन (रा. डॉ. बाबासाहेब आंबेडकरनगर वैजापूर) अशी त्यांची नावे समोर आली. त्यांनी त्यांच्या दोन साथीदारांचीही नावे सांगितले. त्यात यश शिवाजी गावडे (रा. डॉ. बाबासाहेब आंबेडकरनगर वैजापूर, मूळ रा. घोडा गल्ली कोकणवाडी), हर्षल कुमावत (रा. वैजापूर डेपो रोड सरकारी दवाखान्याजवळ ता. वैजापूर) यांचा समावेश आहे. पोलिसांनी चौघांविरुद्ध गुन्हा दाखल करून दोघांना अटक केली असून, त्यांच्या दोन साथीदारांचा शोध घेतला जात आहे. तपास पोलीस उपनिरीक्षक संगीता गिरी करत आहेत.
.jpg)
.jpg)
