छत्रपती संभाजीनगर (सीएससीएन वृत्तसेवा) : सिडको एमआयडीसी पोलीस ठाण्यात नेक्सा शोरूमच्या मॅनेजरने दारू पिऊन राडा केला. पोलिसांना अरेरावी, शिवीगाळ करत वर्दी घालविण्याची धमकी दिली. वैतागलेल्या पोलिसांनी अखेर बळाचा वापर करून त्याला घाटी रुग्णालयात नेले व वैद्यकीय तपासणी करवली. त्याच्याविरुद्ध शुक्रवारी (८ नोव्हेंबर) गुन्हा दाखल केला आहे. ही घटना गुरुवारी (७ नोव्हेंबर) रात्री साडेअकराच्या सुमारास घडली.
ठाणे अंमलदार कैलास देवमन फुले यांनी या प्रकरणात तक्रार दिली आहे. ते ७ नोव्हेंबर २०२४ रोजी रात्री साडेअकराच्या सुमारास ड्युटीवर असताना नेक्सा मारुती शोरूमचा मॅनेजर राहुल वाल्मीक पवार (वय ३२, रा. देवळाई चौक सातारा परिसर छत्रपती संभाजीनगर) हा त्याच्या ताब्यातील मोटारसायकल भरधाव चालवत पोलीस ठाण्याच्या आवारात आला. मोटारसायकल खाली पाडून ठाण्यात आल्याबरोबच त्याच्या तोंडातून दारू पिल्याचा उग्र वास आल्याने पोलिसांना कसेतरी झाले.
राहुल पवारने सांगितले की, मला माझ्या साल्याच्या विरुध्द तक्रार करायची आहे. पोलिसांनी त्याला बसायला सांगितले व तक्रार घेण्यास सुरुवात केली असता त्याने पोलिसांना उद्देशून शिवीगाळ सुरू केली. पोलीस अंमलदार श्री. जोनवाल, श्री. पुसे त्याला समजावून सांगत असताना त्याने आरडा ओरडा करुन अरेरावी सुरू केली. तुमची वर्दी घालवतो, असे धमकावू लागला. पोलीस ठाण्यातच गोंधळ घातला. त्याचा गोंधळ वाढत चालल्याने पोलिसांन बळाचा वापर करून त्याला घाटी रुग्णालयात नेले व तो दारू पिल्याची तपासणी केली. डॉक्टरांनीही तो दारूच्या नशेत असल्याचा अहवाल दिला. त्याच्याविरुद्ध गुन्हा दाखल केला आहे. अधिक तपास पोलीस अंमलदार भीमसिंग सोनवणे करत आहेत.
.jpg)
.jpg)
