पिल्लू पिल्लू… कोण म्हणतंय पाहण्यासाठी ती घराबाहेर आली अन्‌ पुढे जे घडलं ते धक्कादायकच होतं… हनुमाननगरातील घटना

छत्रपती संभाजीनगर (सीएससीएन वृत्तसेवा) : चोरट्यांनी आता मंगळसूत्र चोरीसाठी वेगळाच फंडा अवलंबला आहे. पुंडलिकनगर पोलीस ठाण्याच्या कार्यक्षेत्रातील हनुमाननगरात चोरट्यांनी पिल्लू पिल्लू म्‍हणत महिलेला आधी आवाज दिला. ती घराबाहेर येताच मंगळसूत्र हिसकावून पळ काढला. ही घटना बुधवारी (१९ फेब्रुवारी) रात्री पावणेनऊच्या सुमारास घडली.

४३ वर्षीय महिलेने या प्रकरणात तक्रार दिली आहे. तक्रारीनुसार, ती पती व मुलासह राहते. बुधवारी रात्री पावणेनऊच्या सुमारास घरी एकटीच पाणी भरत असताना एक अनोळखी ज्याचे वय २४ ते २५ असेल, सावळ्या रंगाचा, पांढरी शेरवानी, काळे बूट घातलेला, सडपातळ असा मुलगा त्‍यांच्या घराबाहेर येऊन पिल्लू पिल्लू आवाज देऊ लागला. असं कोण आवाज देतंय, हे पाहण्यासाठी महिला घराबाहेर आली व त्याला कोण पाहिजे, अशी विचारणा केली असता त्‍याने महिलेच्या पोटात लाथ मारून त्‍यांच्या गळ्यातील सोन्याचे मनीमंगळसूत्र ओढून तोडले.

ओढताना महिलेने त्याचा हात धरला असता त्याने हाताला झटका दिला व लोटून दिले. बाहेर उभ्या असलेल्या गाडीवर बसून पळून गेला. त्याच्यासोबत आणखी एक मुलगा होता. महिलेने आरडाओरड केल्याने गल्लीतील लोक जमा झाले. त्यातील शेजारील एका व्यक्‍तीने तो कुल्या उर्फ कृष्णा साळुंके व त्याच्यासोबत गाडीवर त्याचा भाऊ असल्याचे सांगितले आहे. महिलेने पुंडलिकनगर पोलीस ठाणे गाठून तक्रार दिली. २७ हजार रुपयांचे ८ ग्रॅमचे सोन्याचे मंगळसूत्र त्‍याने हिसकावून नेल्याचे तक्रारीत म्‍हटले आहे. त्‍यावरून पोलिसांनी कृष्णा साळुंके व त्‍याच्या भावाविरुद्ध गुन्हा दाखल केला आहे. अधिक तपास पोलीस उपनिरीक्षक अर्जुन राऊत करत आहेत.