बिल्डरकडून फसवणूक झाल्याचा ग्राहकाचा आरोप : अर्धवट घरे ग्राहकांना सोपवून नंतर गायब... ‘महारेरा’च्या आदेशालाही जुमानत नाही..., छत्रपती संभाजीनगरातील धक्कादायक प्रकार

छत्रपती संभाजीनगर (मेट्रोपोलिस पोस्ट वृत्तसेवा) : बालाजी बिल्डकॉनचा बिल्डर दिव्येश देलवाडिया यांच्याकडून फसवणूक झाल्याचा आरोप असणारी तक्रार एका ग्राहकाने केली आहे. अर्धवट घर माथी मारून नंतर उरलेल्या कामांसाठी ठेंगा दाखवत असल्याची तक्रार एका ग्राहकाने ‘महारेरा’कडे केली होती. महारेराने कामे पूर्ण करण्याचे आदेश देऊनही या बिल्डरने ही कामे पूर्ण न करता महारेराला सुद्धा जुमानत नसल्याचे ग्राहकाने तक्रारीत म्हटले आहे.

ग्राहक विजयकुमार गंगाधर दाभाडे (रा. संजयनगर, मुकुंदवाडी) यांनी बिल्डरकडून झालेल्या फसवणुकीची आपबिती मेट्रोपोलिस पोस्ट वृत्तपत्राकडे मांडली. त्यांनी लेखी स्वरुपात सांगितले, की शेंद्रा येथील बालाजी बिल्डकॉनच्या बिल्डर दिव्येश हरिभाऊ देलवाडिया यांच्या ४२ कॉपर स्टोन या रो हाऊस प्रकल्पातील ३० नंबरचे रो हाऊस त्यांनी खरेदी केले. बिल्डरने पूर्ण रक्कम घेऊन घराची ताबा पावती बनवून दिली. मात्र घरातील लाइट फिटिंग, प्लंबिंग, रंगाचे काम करून दिले नाही. याबाबत  वाभाडे यांनी बिल्डर देलवाडिया यांना अनेकवेळा संपर्क करून राहिलेले काम करून देण्याची विनंती केली.

मात्र बिल्डरने प्रतिसाद दिला नाही. अनेक वेळा सांगूनही काम करून दिले जात नसल्याने दाभाडे यांनी वकिलामार्फत कायदेशीर नोटीस पाठवून राहिलेले काम करून देण्याची विनंती केली. मात्र नोटिसीलाही बिल्डरने जुमानले नाही. त्यामुळे दाभाडे यांनी ‘महारेरा’कडे बिल्डरची तक्रार केली. त्यावर महारेराने बिल्डरला रो हाऊसची उरलेली कामे एक महिन्यात करून देण्याचे आदेश दिले. हा आदेश देऊन दोन महिने उलटले तरी बिल्डरने प्रतिसाद न दिल्याने ग्राहक दाभाडे हतबल झाले आहेत. स्वप्नातील घर खरेदी तर केलेच, पण बिल्डरच्या अशा भूमिकेमुळे त्यांना मनस्ताप सोसावा लागत आहे. दरम्यान, या तक्रारीबाबत आम्‍ही बिल्डर देलवाडिया यांची बाजू जाणून घेण्यासाठी संपर्क केला असता होऊ शकला नाही.