Update : तलावात पोहत असताना दोन मुलांचा बुडून मृत्‍यू, हर्सूल सावंगीजवळील नायगावची दुर्दैवी घटना, दोन्ही मुले बायजीपुऱ्याचे!

छत्रपती संभाजीनगर (मेट्रोपोलिस पोस्ट वृत्तसेवा) : तलावात पोहत असताना दोन मुलांचा पाण्यात बुडून दुर्दैवी मृत्यू झाला. ही दुर्दैवी घटना छत्रपती संभाजीनगर तालुक्यातील नायगाव (हर्सूल सावंगीजवळील) शिवारात शुक्रवारी (६ मार्च) सकाळी १० च्या सुमारास समोर आली. फुलंब्री पोलिसांनी घटनास्थळी धाव घेऊन अग्निशामक दलाच्या मदतीने दोघांचे मृतदेह बाहेर काढले.

शेख रिहान शेख अहमद (वय १८, रा. बायजीपुरा, छत्रपती संभाजीनगर) व इम्रान शेख इरफान शेख (वय १७, रा. बायजीपुरा, ह. मु. नायगाव) अशी मृत्यू झालेल्या मुलांची आहेत. रिहान आणि इम्रान मित्र असून, इम्रान चार महिन्यांपूर्वी आई-वडिलांसह नायगाव येथे राहण्यासाठी आला होता. शेख इम्रान नायगाव येथे पेंटिंगचे काम करायचा, तर शेख रिहान बायजीपुऱ्यात लाइट फिटिंगचे काम करत होता. गुरुवारी (५ मार्च) सायंकाळी पाचच्या सुमारास दोघे नायगावहून गणोरीकडे जाणाऱ्या रस्त्यालगत असलेल्या तलावात पोहण्यासाठी गेले होते.

सायंकाळपर्यंत दोघेही घरी न परतल्याने कुटुंबीय, नातेवाइकांनी शोधाशोध सुरू केली. शुक्रवारी सकाळी तलावाच्या काठावर त्यांचे बूट व दोन मोबाइल आढळले. दोघे तलावात बुडाल्याची शक्यता निर्माण झाली. अग्निशामक दलाला पाचारण करण्यात आले. दोन तास प्रयत्न केल्यानंतर दोघांचेही मृतदेह तलावात मिळून आले. मृतदेह छत्रपती संभाजीनगर येथील घाटी रुग्णालयात हलविण्यात आले. उत्तरीय तपासणीनंतर मृतदेह नातेवाइकांच्या ताब्यात देण्यात आले. त्यांच्यावर दुपारी बायजीपुऱ्यात अंत्यसंस्कार करण्यात आले. घटनेची नोंद फुलंब्री पोलिसांनी घेतली असून, अधिक तपास पोलीस निरीक्षक संजय सहाणे यांच्या मार्गदर्शनाखाली पोलीस उपनिरीक्षक सुग्रीव चाटे करत आहेत.