धोरण गेलं उडत... शिल्पाराणी वाडकर यांचा भाजपात प्रवेश!, शहर-जिल्हाध्यक्ष किशोर शितोळेंनी केले पक्षात स्वागत 

छत्रपती संभाजीनगर (मेट्रोपोलिस पोस्ट वृत्तसेवा) : महायुतीतील शिंदे गट- भाजपने एकमेकांच्या पदाधिकारी -कार्यकर्त्यांना आपल्या पक्षात प्रवेश द्यायचा नाही, असे ठरले असले तरी रविवारी (२३ नोव्‍हेंबर) शिल्पाराणी वाडकर यांना शहर-जिल्हाध्यक्ष किशोर शितोळे यांनी भाजपमध्ये प्रवेश दिला.

शिल्पाराणी वाडकर या माजी नगरसेविका असून, शिंदे गटाच्या महिला आघाडी जिल्हाप्रमुख होत्या. १८ नोव्‍हेंबरला त्यांनी शिंदे गटाला सोडचिठ्ठी दिली होती. त्यानंतर त्या भाजपमध्ये येतील, असे सांगण्यात येत होते. अखेर ते खरे ठरले. भाजप-शिंदे गटाच्या ठरलेल्या नव्या धोरणामुळे मंत्री संजय शिरसाट यांनी शिल्पाराणी वाडकर यांना भाजपमध्ये प्रवेश मिळणार नाही, असे म्हटले होते. मात्र भाजपच्या शहर जिल्हा कार्यालयात त्यांचा प्रवेश सोहळा झाला. वाडकर यांच्या भाजपप्रवेशामुळे पक्ष संघटन अधिक सक्षम होणार असल्याचे शितोळे यांनी म्हटले.

या वेळी ताराचंद गायकवाड, छायाताई खाजेकर, हर्षवर्धन कराड, समीर राजूरकर, उज्वलाताई दहिफळे, सचिन गुगळे, सचिन मिसाळ, हाफिज शेख, वंदना शाह, रोहिणी काळे, मीनाताई मिसाळ, संजय जोशी आदींची उपस्थिती होती. दरम्यान, या पक्षप्रवेशावर शिंदे गटाकडून प्रतिक्रिया आली असून, शिंदे गटाच्या महिला आघाडी संपर्कप्रमुख प्रतिभा जगताप यांनी सांगितले, की वाडकर यांनी स्वार्थासाठी भाजपात प्रवेश केला. मात्र त्‍यांच्या जाण्यामुळे शिवसेना कमजोर होणार नाही. हर्षदा शिरसाट यांच्या नेतृत्त्वात महिला आघाडी अधिक मजबूत होईल, असे त्या म्हणाले.