तो अपघात नेमका कसा घडला, FIR मधून आले समोर, रिक्षा अन्‌ कार होत्या राँग साइड..., ३ जखमींवर सुरू आहेत एमजीएममध्ये उपचार

छत्रपती संभाजीनगर (मेट्रोपोलिस पोस्ट वृत्तसेवा) : देवदर्शनावरून परतणाऱ्या दुचाकीस्वार कुटुंबाला राँग साइडने येणाऱ्या ऑटोरिक्षा व कारने उडवले. यात पती, पत्नी आणि त्यांची मुलगी जखमी झाले. ही घटना गुरुवारी (५ फेब्रुवारी) रात्री पावणेआठच्या सुमारास चिकलठाणा आठवडे बाजारसमोर घडली.

किरण मच्छिंद्र बकाल (वय २५, रा. चिकलठाणा पोलीस ठाण्यामागे चिकलठाणा) यांनी या प्रकरणात तक्रार दिली आहे. ते वडील, पत्नी व मुलाबाळांसह राहतात. शेती करतात. गुरुवारी (५ फेब्रुवारी) संध्याकाळी साडेसातच्या सुमारास ते घरून मोटारसायकलीने (MH 20 EW 3448) पत्नी किर्ती, मुलगी काव्या यांच्यासह केंब्रिज चौकासमोरील साई मंदिरात दर्शनासाठी गेले होते. दर्शन करून पावणेआठच्या सुमारास ते परत निघाले. चिकलठाणा आठवडे बाजारसमोर एक रिक्षा (MH 20 BT 8453) व कार (MH 20 GV 5638) एकामागे एक राँग साईडने समोरून येत असल्याचे दिसले.

त्यामुळे बकाल यांनी मोटरसायकल बाजूला घेण्याचा प्रयत्न केला, पण तोपर्यंत रिक्षा व कारचालकाने त्यांना धडक दिली. तिघांनाही नागरिकांनी चिकलठाण्याच्या मिनी घाटीत दाखल केले. नातेवाइकांनी त्यांना एमजीएम हॉस्पिटलमध्ये दाखल केले. रिक्षा व कारचालकांनी बेदरकारपणे, राँग साईडने वाहने चालवून बकाल यांना धडक दिली व तिघांना जखमी केले. बकाल यांच्या उजव्या पायाला फ्रॅक्चर झालेले आहे. तोंडाला, छातीला, बरगडीला मार लागलेला आहे. त्यांच्या पत्नी व मुलीला ओठाला व तोंडाला मार लागून टाके पडले आहेत. सिडको एमआयडीसी पोलिसांनी रिक्षा आणि कारचालकाविरुद्ध गुन्हा दाखल केला आहे. अधिक तपास पोलीस निरीक्षक विठ्ठल पोटे करत आहेत.