वेरूळच्या घाटात भीषण अपघात : दोन ट्रकची समोरासमोर धडक, एका ट्रकवरील बॉयलर अंगावर कोसळून दुचाकीस्वार जावई-सासूचा जागीच मृत्‍यू

खुलताबाद (मेट्रोपोलिस पोस्ट वृत्तपत्राच्या सौजन्याने) : आयशर ट्रक व १६ टायर असलेल्या ट्रकची समोरासमोर धडक झाली. यात आयशर ट्रकवरून बॉयलर नेले जात होते. बेल्ट तुटून हे बॉयलर थेट दुचाकीवरून जाणाऱ्या जावई-सासूवर कोसळले. यात दोघांचाही जागीच चेंदामेंदा झाला. हा भीषण अपघात वेरूळ घाटात आज, ११ सप्‍टेंबरला दुपारी ४ च्या सुमारास घडला. अपघातानंतर ३ वाहतूक वाहतूक ठप्प झाली होती. सायंकाळी सातला बॉयलर बाजूला केले तेव्हा वाहतूक सुरळीत झाली.

त्‍याचवेळी कचरू आणि त्यांच्या सासूबाई चंद्रभागाबाई बॉयलरखाली आल्या. खुलताबाद येथील ग्रामीण रुग्णालयात त्‍यांना नागरिकांनी नेले असता डॉक्टरांनी तपासून मृत घोषित केले. कन्‍नड तालुक्‍यातील मेहेगाव येथील संदीप घुगे हे कुटुंबातील ५ सदस्यांसह खुलताबादला जात होते. त्‍यांच्या कारला बॉयलर येऊन धडकले. त्‍यामुळे कारचा समोरील भाग बॉयलरखाली दबला. सुदैवाने बॉयलर तिथेच थांबला. त्‍यामुळे कारमधील सर्वजण वाचले. कारचे मात्र मोठ्या प्रमाणात नुकसान झाले आहे. खुलताबाद पोलिसांनी घटनास्थळी धाव घेतली. अपघातामुळे वाहतूक ठप्प झाली. खुलताबाद येथे उरूस सुरू असल्याने वाहतूक कोंडीचा मोठा फटका वाहनधारकांना बसला. जड वाहतूक बंद असूनही दोन मोठे ट्रक वेरूळ घाटात कसे आले, असा प्रश्न सर्वांना पडला असून, खुलताबाद पोलिसांचा हलगर्जीपणा यात दिसून येत आहे.