धक्कादायक : सरपंच महिलेच्या तोंडात चापट मारली, नंतर हिला मधी घ्या म्हणत चढवला हल्ला!; खुलताबाद तालुक्‍यातील पाडळीच्या घटनेने खळबळ

खुलताबाद (मेट्रोपोलिस पोस्ट वृत्तसेवा) : सरकारी भिंत पाडल्यानंतर फोटो काढल्याने संतप्त चौघांनी सरपंच महिलेवर हल्ला चढवला. एकाने तोंडात चापट मारली. हल्ल्यात सरपंच जखमी झाल्या असून, त्‍यांनी खुलताबाद पोलीस ठाण्यात दिलेल्या तक्रारीवरून हल्लेखोर चौघांविरुद्ध पोलिसांनी ॲट्रॉसिटीचा गुन्हा दाखल केला आहे.

सोमीनाथ गोविंदराव आहेवाड, तुकाराम गोरख आहेवाड, कृष्णा गोरख आहेवाड,  दीपक गोरख आहेवाड (सर्व रा. पाडळी) अशी गुन्हा दाखल झालेल्यांची नावे आहेत. सरपंच जनाबाई सीताराम वाघ (वय ५५, रा. पाडळी ता. खुलताबाद) यांनी या प्रकरणात तक्रार दिली आहे. त्या अडीच वर्षांपासून पाडळी सोबलगाव या ग्रुप ग्रामपंचायतीच्या सरपंच आहेत. मंगळवारी (२ सप्‍टेंबर) सकाळी ९ च्या सुमारास पाडळी गावातील हमखास मैदानाजवळ अरुण पोपट आघाडे हा गावातील सार्वजनिक बांधकामाची भिंत पाडून त्याचे घर बांधत असल्याची माहिती सरपंच जनाबाई यांना मिळाली.

त्यांनी त्या ठिकाणी जाऊन पाहणी केली असता सार्वजनिक भिंत पडलेली दिसली. मात्र पोपट आघाडे हजर नव्हता. त्यामुळे त्या ठिकाणचे फोटो जनाबाई यांनी मोबाईलमध्ये घेतले. त्याचवेळी अरुण आघाडे याचे नातेवाईक सोमीनाथ गोविंदराव आहेवाड, तुकाराम गोरख आहेवाड, कृष्णा गोरख आहेवाड,  दीपक गोरख आहेवाड आले. त्यांनी धमकावले. हिला आमच्या भिंतीचा फोटो काढण्याचा काय आधिकार आहे? असे म्हणून कृष्णा आहेवाड म्हणाला, की हिला मधी घ्या. त्यानंतर दीपक आहेवाड याने जनाबाई यांच्या तोंडात चापट मारली. त्यामुळे जनाबाई पडल्या. त्यांच्या डाव्या हाताला मार लागला. त्यानंतर जनाबाई यांचा मोठा मुलगा नवनाथ सिताराम वाघ हे त्यांना खुलताबाद पोलीस ठाण्यात घेऊन आले. या घटनेबाबत जनाबाई यांनी पती सिताराम नागू वाघ व लहान मुलगा मच्छिंद्र सिताराम वाघ यांना कळवले. अधिक तपास पोलीस निरीक्षक धनंजय फराटे करत आहेत.