कन्नड (मेट्रोपोलिस पोस्ट वृत्तपत्राच्या सौजन्याने) : अतिवृष्टी व सततच्या पावसामुळे खरीपाचे पीक हातून गेले. त्यामुळे चिंताग्रस्त झालेल्या ३९ वर्षीय शेतकऱ्याने शेतात विष पिऊन आत्महत्या केली. ही घटना कन्नड तालुक्यातील लोहगाव शिवारात सोमवारी (३ ऑक्टोबर) दुपारी ३ च्या सुमारास समोर आली.
अंकुश भगवान मनगटे (रा. लोहगाव, ता. कन्नड) असे आत्महत्या केलेल्या शेतकऱ्याचे नाव आहे. अंकुश यांच्याकडे ४ एकर शेती असून, त्यांनी पेरणीसाठी उसनवारी करून मका व कपाशीची लागवड केली होती. मात्र ऐन मका काढणीवेळी व कापूस वेचणीला आला असताना चार वेळा अतिवृष्टी होऊन हातातोंडाशी आलेली पिके वाया गेली. त्यामुळे कर्ज फेडण्याची चिंता मनगटे यांना सतावू लागली. यातूनच ते नैराश्यात गेले. सोमवारी सकाळी कोणाला काही न सांगता ते घराबाहेर पडले होते. दुपार झाली तरी ते घरी न आल्याने त्यांचे भाऊ त्यांना पहायला शेतात आले. त्यावेळी चिंचेच्या झाडाखाली मनगटे बेशुद्धावस्थेत आढळले.
त्यांनी तत्काळ शेजारील शेतकऱ्यांच्या मदतीने अंकुश यांना चिंचोली लिंबाजी येथील प्राथमिक आरोग्य केंद्रात नेले. मात्र डॉक्टरांनी तपासून मृत घोषित केले. त्यांच्या पश्चात आई, पत्नी, एक मुलगा, दोन मुली, एक भाऊ असा परिवार आहे. यापूर्वी कन्नड तालुक्यातील शफेपूर येथील कृष्णा रावजी दवंगे (वय ४४) या शेतकऱ्याने ३१ ऑक्टोबरला पीक वाया गेल्याने गळफास घेऊन आत्महत्या केली होती. जिल्ह्यात अतिवृष्टीमुळे आजवर १५ हून अधिक शेतकरी आत्महत्या झाल्या आहेत. मात्र अद्यापही शेतकऱ्यांना मदत मिळालेली नाही. पॅकेज जाहीर झाले, पण आकडे मोठे आहेत, पण प्रत्यक्षात शेतकऱ्यांच्या ताटात काहीच नाही, अशी गत आहे. याचा परिणाम सत्ताधाऱ्यांना स्थानिक स्वराज्य संस्था निवडणुकीत भोगावा लागू शकतो, अशी परिस्थिती आहे.
.jpg)
.jpg)
.jpg)
