गंगापूरच्या मांजरी शिवारात ३ चोरट्यांचा धुमाकूळ!; शेतकऱ्याचा कान कापून लुटून नेला लाखाचा मुद्देमाल!!

गंगापूर (गणेश म्हैसमाळे : मेट्रोपोलिस पोस्ट वृत्तसेवा) : गंगापूर तालुक्यातील मांजरी शिवारातील शिंगी रोडवरील गट क्रमांक २४८ मधील शेतवस्तीवर बुधवारी (८ ऑक्टोबर) पहाटे साडेबाराच्या सुमारास (मध्यरात्री) सुमारास तीन चोरट्यांनी धुमाकूळ घातला. शेतकरी दाम्‍पत्‍यावर हल्ला चढवून दागिन्यांसह मोबाइल, २ शेळ्या असा १ लाख ४ हजारांचा मुद्देमाल चोरून नेला.

सौ. कांताबाई शिवाजी संबळे (वय ५३) व शिवाजी नामदेव संबळे (वय ६२) अशी जखमी शेतकरी दाम्‍पत्‍याची नावे आहेत. ते शेतवस्तीवर राहतात. त्यांची मुले नोकरीसाठी बाहेरगावी आहेत. घराबाहेर पडवीत झोपलेल्या शिवाजी संबळे यांच्यावर अचानक तीन चोरट्यांनी हल्ला केला. धारदार शस्त्राने वार करत त्यांचा कान कापला. त्यानंतर घरात झोपलेल्या कांताबाईंना शस्त्रांचा धाक दाखवत दरवाजा उघडण्यास भाग पाडले. घरातील सोन्या-चांदीचे दागिने, मोबाईल तसेच अंगणात बांधलेल्या दोन शेळ्या चोरून चोरट्यांनी पोबारा केला.

त्यांनी १० ग्रॅम सोन्या-चांदीचे दागिने (किंमत ९० हजार रुपये), एक मोबाईल व दोन शेळ्या मिळून सुमारे १ लाख ४ हजार रुपयांचा मुद्देमाल चोरून नेला. घटनेची माहिती मिळताच आज, ९ ऑक्‍टोबरला सकाळी उपविभागीय पोलीस अधिकारी नीलेश पालवे, पोलीस निरीक्षक कुमारसिंग राठोड, पोलीस उपनिरीक्षक औदुंबर म्हस्के, अनिरुद्ध शिंदे यांनी घटनास्थळी भेट देऊन पंचनामा केला. ठसे तज्‍ज्ञ व श्वानपथकालाही पाचारण केले होते. गंगापूर पोलीस ठाण्यात सौ. कांताबाई संबळे यांच्या तक्रारीवरून तिघा चोरट्यांविरुद्ध गुन्हा दाखल करण्यात आला आहे. अधिक तपास पोलीस उपनिरीक्षक औदुंबर म्हस्के करत आहेत.