पैठण (मेट्रोपोलिस पोस्ट वृत्तपत्राच्या सौजन्याने) : १७ वर्षीय मुलाचा बळी गेल्यानंतर बिडकीन पोलीस आणि ग्रामपंचायतीला जाग आली. शनिवारी (२५ ऑक्टोबर) गावातील अनधिकृत बॅनर, होर्डिंग्ज काढण्यात आले आहेत. बेकायदा बॅनर, होर्डिंग्ज, जाहिराती, पाट्या लावणाऱ्यांना पोलीस नोटिसा बजावणार असल्याचे सहायक पोलीस निरीक्षक नीलेश शेळके यांनी पत्रकारांना सांगितले.
बॅनरसमोर बॅनर लावल्याने दोन गटांत तुंबळ हाणामारी होऊन तन्मय गणेश चोरमारे (वय १७, रा. धनगर गल्ली, बिडकीन) याचा मृत्यू झाल्याची घटना बिडकीन बसस्थानक परिसरात गुरुवारी (२३ ऑक्टोबर) रात्री १० च्या सुमारास घडली होती. त्यानंतर बिडकीन पोलीस आणि ग्रामपंचायतीला कारवाईची आठवण झाली. शासकीय विश्रामगृह, बसस्थानक परिसर, रस्त्यावरील सुमारे दहा ते पंधरा लोखंडी होर्डिंग मध्यरात्री १२ पर्यंत काढले. शासकीय विश्रामगृहाच्या जागेवर अनेक वर्षांपासून सर्वपक्षीय नेते, स्वयंघोषित कार्यकर्त्यांची बॅनर लावण्यासाठी जणू स्पर्धा लागत असते. याच बॅनरबाजीतून हाणामारी होऊन मुलाचा मृत्यू झाला.
या घटनेचा ग्रामपंचायतीच्या सत्ताधाऱ्यांचे आणि पोलिसांचेही दुर्लक्ष होत गेल्यानेच ही घटना घडली. त्यामुळे गावात संताप व्यक्त होत आहे. आता तरी यापुढे बॅनर, होर्डिंग्ज लागणार नाहीत, याची काळजी घ्यावी, अशी मागणी होत आहे. दरम्यान, पोलिसांनी सीसीटीव्ही तपासून ऋषिकेश ऊर्फ चिमण जाधव, राहुल ठाणगे, सागर ठाणगे, प्रदीप ठाणगे यांना अटक केली होती. अन्य एक संशयित संतोष ठाणगे छत्रपती संभाजीनगरमध्ये खासगी रुग्णालयात उपचार घेत असून, पोलिसांनी या रुग्णालयात कर्मचारी तैनात केला आहे. अटक केलेल्या चौघांना शनिवारी न्यायालयात हजर केले असता पाच दिवसांची पोलीस कोठडी सुनावण्यात आली.
.jpg)
.jpg)
