छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : खात्रीशीर बियाणे, चांगले पीक येण्याची खात्री, रोग पडणार नसल्याचा दावा अशा बियाणे कंपन्यांच्या जाहिरातीला भुलून एका शेतकऱ्याने कपाशीची लागवड केली खरी; पण कंपन्यांचा एकही दावा खरा ठरला नाही. अखेर शेतकऱ्याने त्या कंपन्यांविरोधात मुंबई उच्च न्यायालयाच्या औरंगाबाद खंडपीठात धाव घेतली आणि त्या कंपन्यांना धडा शिकवला. खंडपीठाने चारही बियाणे कंपन्यांना प्रत्येकी ५० हजार रुपयांचा दंड ठोठावून ही रक्कम शेतकऱ्याला अदा करण्याचे आदेश दिले आहेत.
कायगाव (ता. सिल्लोड) येथील याकूब अय्युब शेख या शेतकऱ्याने २०१८ साली आपल्या नऊ एकर शेतात कपाशीची लागवड केली होती. यासाठी शेख यांनी आदित्य, तिअरा, राशी आणि नामधारी सीड्स या कंपन्यांकडून बियाणे विकत घेतले होते. शेख यांनी ७५० रुपयांची ४७५ ग्रॅमच्या बियाण्यांची नऊ पाकिटे खरेदी केली होती. संबंधित बियाणांची रोगप्रतिकारक शक्ती अधिक असल्याचे आणि त्यामुळे कपाशीवर रोग पडणार नाही, असे बियाणे कंपन्यांच्या पाकिटावर नमूद केलेले होते. हा दावा खरा मानून शेख यांनी त्या पाकिटांची खरेदी केली आणि बियाणे शेतात लावले. मात्र, काही दिवसांतच पिकावर रोग पडला. त्यामुळे कपाशी उगवलीच नाही.
बियाणे बोगस निघाल्यामुळे शेख यांचे मोठे नुकसान झाले होते. यामुळे संतापलेल्या शेख यांनी राज्याच्या कृषी आयुक्तांकडे या संदर्भात दावा दाखल केला. कृषी आयुक्तांनी शेख यांच्या याचिकेवर सुनावणी घेत संबंधित चारही कंपन्यांनी शेख यांना प्रत्येकी २० हजार रुपये नुकसान भरपाई द्यावी, असा आदेश दिला होता. मात्र, ही भरपाई तुटपुंजी असल्याने शेख यांनी औरंगाबाद खंडपीठात याचिका दाखल करून या आदेशाला आव्हान दिले होते. खंडपीठात ॲड. किशोर खाडे यांनी याचिकाकर्ते शेख यांची बाजू मांडली. या याचिकेच्या अंतिम सुनावणीवेळी न्या. आर. एम. जोशी यांनी शेख यांचा दावा मान्य करत चारही कंपन्यांना प्रत्येकी ५० हजार रुपयांचा दंड ठोठावला. न्यायालयाच्या आदेशानुसार आता चारही कंपन्यांनी ही रक्कम याचिकाकर्ते शेख यांना द्यावयाची आहे.
.jpg)
.jpg)
