साखरपुडा उरकून मित्रांसोबत दुचाकीने घरी परतणाऱ्या नवरदेवासह मित्राचा अपघाती मृत्यू, सुसाट कारने उडवले!, वैजापूर तालुक्यातील दुर्दैवी घटना

वैजापूर (मेट्रोपोलिस पोस्ट वृत्तसेवा) : साखरपुडा झाल्यानंतर कारऐवजी नवरदेव दोन मित्रांसोबत दुचाकीने ट्रिपलसीट गावी निघाला. त्यांच्या दुचाकीला सुसाट कारने उडवले. यात नवदेवासह त्याच्या मित्राचा मृत्यू झाला, तर तिसरा मित्र जखमी आहे. ही घटना रविवारी (३० नोव्‍हेंबर) रात्री आठच्या सुमारास शिऊर बंगला (ता. वैजापूर) शिवारात घडली.

नवरदेव रवी पोपट गायकवाड (वय २८, रा. देवगाव रंगारी) व मित्र रावसाहेब गोरे (वय ३५) अशी मृत्यू झालेल्यांची नावे आहेत. रवीचा साखरपुडा म्हसोबाची लोणी (ता. राहाता, जि. अहिल्यानगर) येथील मुलीसोबत झाला. कुटुंबीय आणि नातेवाइकांसोबत जाण्याऐवजी रवी दोन मित्रांसोबत दुचाकीने देवगाव रंगारीकडे निघाला. रात्री आठच्या सुमारास शिऊर बंगल्याकडून देवगाव रंगारीच्या दिशेने जाताना छत्रपती संभाजीनगरकडून आलेल्या भरधाव कारने त्यांना उडवले. दुचाकीवरील तिघेही जखमी झाले.

ग्रामस्थांनी तत्काळ धाव घेत मदतकार्य करून जखमींना रुग्णवाहिकेतून छत्रपती संभाजीनगरच्या घाटी रुग्णालयात दाखल केले. मात्र त्याआधीच रवीचा मृत्यू झाला. डॉक्टरांनी त्याला तपासून मृत घोषित केले. तर मित्र रावसाहेब गोरे यांचा उपचारादरम्यान मृत्यू झाला. सचिन आनंदा धोत्रे (२५, दोघे रा. देवगाव रंगारी) जखमी असून, त्यांच्यावर उपचार सुरू आहेत. शिऊर पोलिसांनी घटनेची नोंद घेतली आहे. साखरपुड्यानंतर महिनाभराच्या अंतराने लग्नाची तारीख धरण्याचे ठरले होते. मात्र रवीच्या मृत्यूमुळे अवघ्या कुटुंबावर दुःखाचा डोंगर कोसळला. त्याच्या पश्चात आई-वडील, भाऊ, बहीण, भावजय, पुतणे असा परिवार आहे.