खुलताबादजवळ भीषण अपघात : सुसाट कारने दोन शेतकऱ्यांना उडवले, दोघांचाही जागीच मृत्‍यू

खुलताबाद (सीएससीएन वृत्तसेवा) : शेतातून घराकडे पायी येत असताना दोन शेतकऱ्यांना सुसाट कारने उडवले. यात दोघांचाही जागीच मृत्‍यू झाला. ही दुर्दैवी घटना छत्रपती संभाजीनगर- खुलताबाद रोडवरील नंद्राबादजवळ (ता. खुलताबाद) येथे आज, ३ ऑगस्टला सकाळी आठला घडली.

ज्ञानेश्वर राधाकृष्ण जाधव (वय ३४) आणि अशोक यादव घुसळे (वय ५५, दोघे रा. नंद्राबाद) अशी मृत्‍यू झालेल्यांची नावे आहेत. भारतीय सैन्यातील सुभेदार मनोजकुमार मारूती काटकर (रा. छावणी, छत्रपती संभाजीनगर) हे पत्नीसह वेरूळला कारने जात होते. त्‍याचवेळी नंद्राबाद गावाजवळ तलत डीएड कॉलेजसमोर ज्ञानेश्वर जाधव व अशोक घुसळे ह शेतकरी शेतातून घराकडे पायी परतत होते. काटकर यांचे कारवरील नियंत्रण सुटून त्‍यांनी शेतकऱ्यांना उडवले. दोघांचाही जागीच मृत्यू झाला.

अपघातानंतर काटकर हे कारने पळून जात असताना खुलताबाद पोलिसांनी त्‍यांना म्हैसमाळ रोडवर कारसह ताब्‍यात घेतले. घटनास्थळी पोलीस निरीक्षक धनंजय फराटे, पोलीस अंमलदार शेख जाकीर, सिध्दार्थ सदावर्ते यांनी भेट देऊन पंचनामा केला. मृतदेह खुलताबाद ग्रामीण रुग्णालयात आणून उत्तरीय तपासणी करण्यात आली. ज्ञानेश्वर अविवाहित होता. अशोक घुसळे यांच्या पश्चात पत्नी, ९ मुली, मुलगा असा परिवार आहे. खुलताबाद पोलीस ठाण्यात कारचालक मनोजकुमार काटकर यांच्याविरुद्ध गुन्हा दाखल करण्यात आला आहे.  काटकर यांची प्रकृती बिघडल्याने त्‍यांना छत्रपती संभाजीनगर येथील खासगी रुग्णालयात दाखल करण्यात आले आहे.