बिडकीनमध्ये बॅनरसमोर बॅनर लावल्याने दोन गट भिडले; १७ वर्षीय मुलाची हत्या!!, दंगा काबू पथक तैनात

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : बॅनरसमोर बॅनर लावल्याने दोन गटांत तुंबळ हाणामारी होऊन एका १७ वर्षीय मुलाचा मृत्यू झाल्याची खळबळजनक घटना बिडकीन (ता. पैठण) येथे बसस्थानक परिसरात गुरुवारी (२३ ऑक्‍टोबर) रात्री १० च्या सुमारास घडली. तन्मय गणेश चोरमारे (रा. धनगर गल्ली, बिडकीन) असे हत्या झालेल्या मुलाचे नाव आहे.

बिडकीन पोलीस ठाण्यात योगेश मारुती दाणे यांनी तक्रार दिली. त्यांचा भाचा ऋत्विक धर्मे याने बसस्थानक परिसरात दीपावली शुभेच्छांचे बॅनर लावले होते. त्याच्या बॅनरसमोरच ऋषिकेश उर्फ चिमण जाधव याचा वाढदिवस असल्याने त्यानेही स्वतःला इतरांकडून शुभेच्छा देणारे बॅनर लावले. यातून ऋत्विक व ऋषिकेश यांचा कॉलवर वाद झाला. या वादातून ऋषिकेशने राहुल ठाणगे, सागर ठाणगे, प्रदीप ठाणगे, संतोष ठाणगे आणि इतर ३० ते ३५ जणांसोबत मिळून गुरुवारी रात्री १० च्या सुमारास ऋत्विकवर प्राणघातक हल्ला चढवला. या वेळी ऋत्विकसोबत तन्मय चोरमारे व त्यांचे मित्र होते. दोन्ही गटांत तुंबळ हाणामारी सुरू झाली. लोखंडी रॉड व लाठ्याकाठ्यांनी एकमेकांवर तुटून पडले.

यात तन्मयच्या डोक्याला गंभीर मार लागून तो गंभीर जखमी झाला. तो रक्‍तबंबाळ होऊन कोसळला. त्यानंतर ऋषिकेश व त्याचे साथीदार पसार झाले. तन्मयला छत्रपती संभाजीनगर येथील खासगी रुग्णालयात दाखल केले असता शुक्रवारी (२४ ऑक्‍टोबर) दुपारी दोनला त्याचा मृत्‍यू झाला. दोन्ही गटांतील लोक हाणामारीत जखमी झाले. तन्मयच्या मृत्यूची बातमी गावात धडकताच त्याच्या नातेवाइकांनी संतप्त होऊन बिडकीन बाजारपेठ बंद केली. गावात तणाव निर्माण झाला. त्यामुळे बिडकीन पोलिसांनी अतिरिक्‍त बंदोबस्त तैनात केला.

दंगा काबू पथकाला तैनात करण्यात आले. शुक्रवारी सायंकाळनंतर बिडकीन पोलिसांनी सीसीटीव्ही फूटेज तपासून ५ हल्लेखोरांना ताब्‍यात घेतले आहे. इतर फरारी आहेत. १७ वर्षीय तन्मयचे वडील वारल्याने त्याची आई सोनाली चोरमारे या बिडकीन येथे माहेरी राहून त्याचा सांभाळ करत होत्या. त्यांना एक मुलगी असून, तन्मय एकुलता एक मुलगा होता. त्यांच्यावर दुःखाचा डोंगर कोसळला. शुक्रवारी रात्री १०:३० वाजता त्याच्यावर अंत्यसंस्कार करण्यात आले. तो श्रीरामपूर येथे अभियांत्रिकीचे प्रथम वर्षात शिक्षण घेत होता. दिवाळीनिमित्त बिडकीनला आला होता. पाडव्याला त्याने नवीन मोबाइलही घेतला होता. सध्या बिडकीनमध्ये तणावपूर्ण शांतता आहे.