Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : मुलभूत सुविधांसाठी वाळूज एमआयडीसीतील वडगाव कोल्हाटी येथील गट नंबर ९ भागातील महिलांनी काल, ११ डिसेंबरपासून उपोषणास्त्र उपसले आहे. रात्री अन् आज सकाळी कडाक्याच्या थंडीने महिला कुडकुडत होत्या, पण लाज सोडलेल्या पदाधिकाऱ्यांना त्यांच्याकडे पहायलाही वेळ मिळाला नाही. निवडणुकीत मतांसाठी दारोदार भटकणाऱ्या पदाधिकाऱ्यांच्या या वर्तनाबद्दल संताप व्यक्त होत आहे. दुसरीकडे महिलांनी काल रात्री थंडीचा सामान भक्तीऊर्जेने केला. उपोषणस्थळी सारेच भजनात तल्लीन झालेले पहायला मिळाले.
पाणी, रस्ते आणि ड्रेनेज या ३ मुलभूत गरजांसाठी अनेक वर्षे ग्रामपंचायतीकडे उंबरठे झिजवल्यानंतर महिलांनी उपोषण सुरू केले आहे. सध्या हिवाळ्याचे दिवस असून, अगदी घरातही लोक कुडकुडत आहेत, तर दुसरीकडे या ३० ते ३५ महिला उघड्यावर उपोषण करताना आज सकाळी थंडीत अक्षरशः कुडकुडत होत्या. रात्री या भागातील पुरुष मंडळींनी पुढाकार घेत भजनी मंडळाने आमंत्रित करून महिलांना भक्तीची ऊर्जा देण्याचे काम केले. रात्रभर सुरू राहिलेल्या या भजन-कीर्तनामुळे उपोषणस्थळी भावनिक ऊब मिळाली. ज्योती मारोती कांबळे यांच्या नेतृत्वात ३० ते ३५ महिला उपोषणाला बसल्या आहेत. सर्व कर भरत असूनही मुलभूत सुविधा पुरविण्यात ग्रामपंचायत अपयशी ठरत असल्याची तक्रार या उपोषणकर्त्या महिलांची आहे. जोपर्यंत लेखी दिले जात नाही तोपर्यंत आता माघार घ्यायची नाही, असा पवित्रा त्यांनी घेतला आहे. एकता, श्रद्धा आणि संघर्षाची भावना अधिक मजबूत होताना दिसत आहे.
.jpg)
.jpg)
