छत्रपती संभाजीनगर (मेट्रोपोलिस पोस्ट वृत्तसेवा) : २५ वर्षांपासून केवळ प्रतीक्षाच असलेल्या शहर पाणी योजनेत गुढीपाडव्याच्या मुहूर्तावर (१९ मार्च) दखलपात्र प्रगती झाली. जायकवाडी धरणात उभारलेल्या जॅकवेलमध्ये पाणी आणण्यात सायंकाळी ४:४० वाजता यश आले. महापालिका आयुक्त जी. श्रीकांत यांनी जॅकवेलमध्ये उभे राहून पाण्याचे दोन घोट पिले आणि गोदामाईचे आभार मानले. महाराष्ट्र जीवन प्राधिकरणाच्या मुख्य अभियंता मनीषा पलांडे यांच्या हस्ते जलपूजन करण्यात आले.
धरणातील पाणी गुरुवारी सकाळी ११ ला सायफन पद्धतीने जॅकवेलमध्ये घेण्यात येणार होते. परंतु, किरकोळ तांत्रिक अडचण आली. ती दूर करण्यात सहा तास गेले. अखेर जॅकवेलमध्ये पाणी येण्यास सायंकाळचे ४:४० वाजले. धरणात ३४ मीटर खोल जॅकवेलमध्ये महापालिका आयुक्त जी. श्रीकांत यांनी जाऊन फेसाळलेले पांढरेशुभ्र पाणी दोन घोट पिले. महाराष्ट्र जीवन प्राधिकरण आणि महापालिकेच्या अधिकारी व कर्मचाऱ्यांना शुभेच्छा दिल्या. आज, २० मार्चला आणखी काही प्रमाणात पाणी घेऊन विविध टप्प्यांवर लिकेजची तपासणी केली जाईल. दोन- तीन दिवस पाणी साठवून ठेवले जाणार असून, कुठेही लिकेज नसल्याची खात्री झाल्यावर पंपाची टेस्टिंग केली जाईल. नंतर पाणी २५०० मि.मी. व्यासाच्या जलवाहिन्यांत घेण्यात येईल. महाराष्ट्र जीवन प्राधिकरणच्या मुख्य अभियंता मनिषा पलांडे म्हणाल्या, की टेस्टिंग झाल्यानंतर जलशुद्धीकरण केंद्रांतून शहरातील जलकुंभांपर्यंत पाणी पोहोचवले जाणार आहे. तिथून घरांपर्यंत पाणीपुरवठा केला जाईल.
