सुखना नदीला पूर, नारेगाव पाण्याखाली!; ५०० हून अधिक घरे-दुकानांत पाणीच पाणी, हर्सूल सावंगी चौकासह शहरालगतच्या गावांत ढगफुटीसदृश पाऊस

छत्रपती संभाजीनगर (सीएससीएन वृत्तसेवा) : शुक्रवार (१५ ऑगस्ट) आणि शनिवार (१६ ऑगस्ट) सलग दोन दिवस झालेल्या ढगफुटीसदृश पावसामुळे शहरालगतच्या हर्सूल सावंगी, चौका, कोलठाण, पळशी, वरुड काजी व पिसादेवी या गावांत पाणीच पाणी साचले आहे. सुखना नदीला मोठा पूर आल्याने नदीपात्रालगतच्या नारेगाव परिसरातील २१ वसाहती पाण्याखाली गेल्या आहेत. पाचशेहून अधिक घरे व दुकानांत पाणी शिरले आहे. त्‍यामुळे मोठे नुकसान झाले आहे.

नारेगावमध्ये सुखना नदी, नाल्यांवर अनेक अतिक्रमणे झाल्याने नदीपात्र उथळ झाले आहे. भरीस भर कचरा डेपोजवळील कचरा, थर्माकोल वाहून आल्याने नदी, नाल्याचे पाणी थेट वसाहतीत शिरले. काही मिनिटांत रस्ते, वाहने पाण्याखाली गेली. नागरिकांची तारांबळ उडाली. एनडीआरएफने मदतकार्य सुरू केले. आज, १७ ऑगस्टच्या सकाळपर्यंत पावसाच्या जोरधारा कायम असल्याने नुकसान वाढण्याची शक्‍यता आहे. सुदैवाने वेळीच मदतकार्य सुरू केल्याने कोणतीही मनुष्यहानी झालेली नाही. छत्रपती संभाजीनगर शहरात शुक्रवारी सरासरी १७.५, तर शनिवारी १६,३ मि.मी. पाऊस पडल्याचे हवामान विभागाकडून स्पष्ट करण्यात आले.

९ मंडळांत अतिवृष्टी
छत्रपती संभाजीनगर जिल्ह्यातील ९ मंडळांत अतिवृष्टी झाली असून, छत्रपती संभाजीनगर शहराजवळील असलेल्या वरुड काजी, पिसादेवी, हर्सूल सावंगी आणि चौका तसेच वैजापूर तालुक्यातील गारज व लोणी मंडळात ढगफुटीसदृश्य पाऊस झाला आहे. त्‍यामुळे पिकांचे मोठे नुकसान झाले आहे. वरुड काजी मंडळात ७२.५ मि.मी. तर पिसादेवी मंडळात ७२.५ मि.मी. पावसाची नोंद झाली. चौका येथे १००.८ मि.मी. पाऊस पडला. लाडसावंगी मंडळात ७१.३ मि.मी., गंगापूर तालुक्यातील तुर्काबाद मंडळात ७४ मि.मी., शेंदूरवादा येथे ६५.३ मि.मी., डोणगाव मंडळात ९१.८ मि.मी. पाऊस कोसळला. वैजापूर तालुक्‍यातील लोणी मंडळात ११७.३ मि.मी. पाऊस तर गारज मंडळात सर्वाधिक आणि ढगफुटीसदृश १२६.५ मि.मी. पाऊस झाला आहे. कन्नड तालुक्यातील देवगाव येथे ८६.५ मि.मी. पाऊस झाल्याची नोंद झाली आहे. सुदैवाने जिल्ह्यात कुठेही जीवित हानी झालेली नाही, मात्र नुकसान मोठ्या प्रमाणावर झाले आहे.