पडेगावच्या ‘हरि पार्कचा राजा’ गणेशोत्सव मंडळाने साकारलाय महाबळेश्वरच्या 'या' मंदिराचा अनोखा देखावा, पाहण्यासाठी होतेय गर्दी!!

छत्रपती संभाजीनगर (सीएससीएन वृत्तसेवा) : पडेगावच्या पोलीस कॉलनीतील हरि पार्कमध्ये गणेशोत्सव मंडळाने यंदा महाबळेश्वरातील कृष्णाबाई मंदिराचा देखावा सादर केला असून, हा देखावा सर्वांच्या कुतूहलाचा ठरत आहे. देखावा पाहण्यासाठी गर्दी होत आहे.

कृष्णाबाई मंदिर हे जुन्या महाबळेश्वरात पाचगंगा मंदिराजवळ वसलेले एक प्राचीन व पवित्र मंदिर आहे. हे मंदिर भगवान शिव व देवी कृष्णाबाई यांना समर्पित आहे. गेल्या ५ वर्षांपासून हरी पार्कचे गणेश मित्र मंडळ नवनव्या संकल्पना घेऊन गणेशोत्सव साजरा करत आहे. यंदा त्यांनी सादर केलेल्या देखाव्यामुळे हे गणेशोत्सव मंडळ चर्चेत आले आहे. याबाबत मंडळाच्या पदाधिकाऱ्यांनी सांगितले, की ही थीम आम्हाला दोन महिन्यांपूर्वी सुचली. जेव्हा आम्ही महाबळेश्वर येथील कृष्णाबाई मंदिराला भेट दिली होती, तेव्हा तिथलं शांत वातावरण, मंदिराची रचना आणि तिथून उगम पावणारी पवित्र कृष्णा नदी पाहून आम्हाला प्रेरणा मिळाली. मग आम्ही मंदिराची थीम साकारण्याचा निर्णय घेतला. या मंडळाचे अध्यक्ष प्रज्वल राजेंद्र मुळे, उपाध्यक्ष अंकित सुभाष वळवळे, सचिव प्रथमेश लक्ष्मण तळेकर, सदस्य रोहित आबाराव सोनवणे, श्रेयस खिल्लारे, गोपाल फलके, विशाल लोखंडे, हर्ष खरात, स्वप्नील सोनुने, रितेश शेजूळ, यश निकम, कार्तिक जंजाळ आहेत.
असे आहे मंदिर...
महाबळेश्वरचे कृष्णाबाई मंदिर हेमाडपंती शैलीत काळ्या दगडातून बांधलेले असून, सूक्ष्म नक्षीकाम आढळते. काही नोंदींनुसार हे मंदिर इ.स. १८८८ मध्ये रत्नागिरीच्या राजाने बांधले, तर काही आख्यायिका याला पांडवकाळाशी जोडतात.