रिक्षाचालकाच्या मुजोरीचा कहर : भाड्यावरून वादानंतर महिलेला ढकलून देत पायावरून नेली रिक्षा!; मोंढा नाका सिग्नलजवळील घटना

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : हायकोर्टाजवळून नेहमीप्रमाणे शेअरिंग रिक्षा केल्यानंतर मोंढा नाका सिग्‍नलवर महिला उतरली. या वेळी रिक्षाचालकाने तिने दिलेल्या १०० रुपयांतील पैसे परत करण्याऐवजी १०० रुपयेच झाल्याचे सांगत वाद घालायला सुरुवात केली. मी रोज येते, १० रुपयेच देते, असे ती सांगत असताना रिक्षावाल्याने तिला ढकलून दिले आणि तिच्या पायावरून रिक्षा घालत पळून गेला. तिच्या पायाला गंभीर इजा झाली आहे. ही घटना गुरुवारी (४ सप्‍टेंबर) सकाळी सातच्या सुमारास घडली.

तक्रारदार ३८ वर्षीय महिला शिवशंकर कॉलनीत राहते. त्या हायकोर्ट परिसरातील एका रुग्णालयात नोकरी करतात. बुधवारी रात्रपाळी करून गुरुवारी सकाळी सातला घरी जाण्यासाठी शेअरिंग रिक्षात बसल्या. रिक्षात आधीच दोन महिला बसलेल्या होत्या. त्या आकाशवाणी चौकात उतरल्या. मोंढा नाका सिग्नलजवळ तक्रारदार महिला उतरली. सुटे नसल्याने त्यांनी १०० रुपये दिले आणि पैसे परत मागितले. त्यावर रिक्षाचालकाने या अंतराचे १०० रुपये होत असल्याचे सांगून ९० रुपये परत देण्यास नकार दिला.

महिलेने त्याला सांगितले, की मी रोज ये-जा करते. रोज १० रुपयेच देते... मात्र त्यावर रिक्षाचालकाने अर्वाच्च भाषेत बोलायला सुरुवात केली. वाद वाढून त्याने थेट महिलेचा हात धरून जोरात खाली ढकलले. महिला रस्त्यावर कोसळली. तिला लगेच उठता आले नाही. त्याचवेळात चालकाने रिक्षा तिच्या पायावरून घालत सुसाट निघून गेला. तिच्या पायाला गंभीर इजा झाली आहे.

रुग्णालयात उपचार घेऊन सायंकाळी महिलेने जवाहरनगर पोलीस ठाणे गाठून तक्रार दिली. घाबरल्याने महिलेला रिक्षाचा क्रमांकही टिपून घेता आला नाही. जवाहरनगर पोलीस रिक्षाचालकाचा कसून शोध घेत आहेत. रिक्षाचालक अंदाजे २५ वर्षांचा असावा. महिलेची पर्स, मोबाइलही रिक्षातच राहिली असून, तो वाद घालत असताना त्याने नशा केल्याचा वास येत होता, असे महिलेने पोलिसांना सांगितले.