धिंड पॅटर्न : ४ ड्रग्‍ज तस्करांना बेड्या घालून जिन्सी परिसरातून मिरवले!; शेवटपर्यंत तस्करांनी मान वर उचलली नाही..., नातेवाइक-मित्रांनी पाहिले...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : छत्रपती संभाजीनगर शहर पोलिसांचा गुन्हेगारांची धिंड घालण्याचा पॅटर्न आता चांगलाच गाजत आहे. यामुळे गुन्हेगाराची मस्ती तर जिरतेच, पण सामान्यांच्या मनातून त्‍यांच्याविषयीची भीतीही कमी होते. गुरुवारी (४ सप्टेंबर) मुकुंदवाडी पोलिसांनी ड्रग्ज तस्कर चौघांची जिथे त्यांनी चरस विकले, त्या जिन्सी परिसरातून धिंड काढली.

मोहंमद मुज्जमील मोहंमद नजीर (३४), लोमान ऊर्फ नोमान खान इरफान खान (वय २१, दोघेही रा. रहेमानिया कॉलनी), मोहंमद लईखुद्दीन मोहंमद मिराजोद्दीन (वय २५, रा. रहीमनगर), शेख रेहान शेख अशपाक (वय १९, रा. कटकट गेट) अशी धिंड काढलेल्या ड्रग्ज तस्करांची नावे आहेत. ड्रग्ज माफिया शेख सुलताना शेख मैनोद्दीन (वय ४५, रा. अंबिकानगर, गल्ली क्र. ८, मुकुंदवाडी) हिच्याकडून ड्रग्ज घेऊन ते कॉलेज परिसरात विकायचे. मुकुंदवाडी पोलिसांनी शेख सुलतानाच्या घरात छापा मारून १५ लाख रुपयांचे दीड किलो चरस आणि दोन दुचाकी ३१ ऑगस्टला जप्त केल्या होत्या.

ड्रग्ज तस्कर जिथे चरस विकायचे, तिथेच रहेमानिया कॉलनी, रहिमनगर, आझाद चौक या भागांत पोलिसांनी त्यांची हातकडीसह धिंड काढली. नातेवाइक, मित्र पाहत असल्याने तस्करांची मान वर करून पाहण्याचीही हिंमत झाली नाही. अनेकांनी त्यांचे फोटोसेशन केले. तस्करांच्या घराची झाडाझडतीही घेण्यात आली. पोलीस निरीक्षक सचिन इंगोले, सहायक पोलीस निरीक्षक संजय बहुरे, गुन्हे शाखेचे विनायक शेळके, पोलीस अंमलदार नरसिंग पवार, बाबासाहेब कांबळे, गणेश वैराळकर, अनिल थोरे, गणेश वाघ यांनी त्यांना बेड्या घालून मिरवले. परराज्यातून ड्रग्ज मागवण्यासाठी आगाऊ रक्कम द्यावी लागायची. तेव्हा मुज्जमील आधी पैसे लावायचा. नंतर टक्केवारीवर व्याज वसूल करत होता. तीन वर्षांपासून ही टोळी ड्रग्ज तस्करीत सक्रिय होती, असे पोलीस सूत्रांनी सांगितले.