डॉक्‍टरच डॉक्‍टरांच्या विरोधात उभे ठाकले!; म्हणे, ते आमच्या बरोबरीचे नाहीत!; क्रांती चौकात आंदोलनासाठी जमले, शेकडो रुग्णांचे हाल केले!!

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने ) : सध्या डॉक्‍टरच डॉक्‍टरांच्या विरोधात उभे ठाकले असून, सर्टिफिकेट कोर्स इन मॉडर्न फार्माकॉलॉजी (सीसीएमपी) उत्तीर्ण होमिओपॅथी डॉक्टर आमच्या बरोबरीचे नाहीत, असे म्‍हणत इंडियन मेडिकल असोसिएशनने (आयएमए) गुरुवारी (१८ सप्‍टेंबर) संप पुकारत सकाळी १० ला क्रांती चौकात जमून निदर्शने केली. या संपामुळे रुग्णांचे हाल झाले. खासगी रुग्णालयांतील रोजची ७ हजारांची ओपीडी ठप्प झाली, तर २०० ऑपरेशन पुढे ढकलावे लागल्याची माहिती सूत्रांनी दिली आहे.

‘सीसीएमपी’ पदवीधारक होमिओपॅथी डॉक्टरांच्या महाराष्ट्र मेडिकल कौन्सिलकडे (एमएमसी) होणाऱ्या नोंदणीच्या विरोधात आयएमए उभी ठाकली आहे. त्‍यामुळे आता डॉक्‍टरांमध्येच हा संघर्ष पेटला आहे. दहा वर्षे अभ्यास, तरीही आता अपमान, एमएमसी म्हणजे एमबीबीएस, सीसीएमपी नव्हे, अशा घोषणा आंदोलनकर्त्या डॉक्‍टरांनी दिल्या. सीसीएमपी कोर्स केलेले डॉक्‍टर आमच्या बरोबरीचे नाहीत. सरकारने तत्‍काळ निर्णय मागे घ्यावा, अशी मागणी या वेळी आयएमएचे अध्यक्ष डॉ. अनुपम टाकळकर यांनी केली. आंदोलनात डॉ. टाकळकर यांच्यासह सचिव डॉ. योगेश लक्कास, डॉ. यशवंत गाडे, डॉ. संतोष रंजलकर, डॉ. राजेंद्र गांधी, डॉ. आसावरी टाकळकर, डॉ. सोनाली सावजी, डॉ. दत्ता कदम, डॉ. प्रवीण सोनवतीकर, डॉ. अपर्णा राऊळ, डॉ. सुनील धुळे, मार्डचे प्रतिनिधी डॉ. ऋषिकेश देशमुख आदी सहभागी झाले होते.

शहरातील ५५० रुग्णालयांतील २५०० हून अधिक डॉक्टरांनी संपात भाग नोंदवला. घाटीतील निवासी डॉक्टरही सहभागी झाले. त्‍यामुळे शेकडो रुग्णांचे हाल झाले. घाटीचे अधिष्ठाता डॉ. शिवाजी सुक्रे यांनी सांगितले, की ५० टक्के निवासी डॉक्टर कामावर असल्याने रुग्णसेवेवर फारसा परिणाम झाला नाही. अत्यावश्यक सेवा सुरळीत होती. संपादरम्यान तातडीच्या असलेल्या शस्‍त्रक्रिया करण्यात आल्या. मात्र नियोजित २०० शस्‍त्रक्रिया पुढे ढकलण्यात आल्याचे सूत्रांनी सांगितले.