बजाजनगरात नागरिक एकवटले, मालेगाव घटनेचा निषेध करत क्रूरकर्म्याला फाशीच्या शिक्षेची केली एकमुखी मागणी

छत्रपती संभाजीनगर (मेट्रोपोलिस पोस्ट वृत्तसेवा) : नाशिक जिल्ह्यातील मालेगाव तालुक्यातील डोंगराळे येथील साडेतीन वर्षांच्या चिमुकलीवर लैंगिक अत्याचार करून तिची निर्घृण खून करणाऱ्या नराधमाला फाशीची शिक्षा द्यावी, अशी एकमुखी मागणी करत सर्वपक्षीय व सर्वधर्मीय नागरिक बजाजनगरातील महाराणा प्रताप चौकात एकवटले होते. चिमुकलीला श्रद्धांजली अर्पण करत त्यांनी घटनेचा जाहीर निषेध केला.

आज, २४ नोव्‍हेंबरला सकाळी साडेअकराच्या सुमारास चिमुकलीच्या प्रतिमेला पुष्पांजली अर्पण करून कार्यक्रमास सुरुवात झाली. आयोजक ॲड. नामदेव सावंत यांनी प्रास्ताविकात प्रकरण जलदगती न्यायालयात चालवून आरोपीस तात्काळ फाशी, पीडित कुटुंबास एक कोटी रुपयांची मदत, कुटुंबातील सदस्यास सरकारी नोकरी व अशा घटनांना आळा घालण्यासाठी विशेष कायदा करण्यात यावा, अशी मागणी मांडली. या वेळी आयर्न लेडी काजलताई केदारे, प्रज्ञाताई बनसोडे, सीमाताई लातूरकर, भगतसिंग शाळेच्या विद्यार्थिनी, रमेश दाभाडे, मनीष शेळके, प्रकाश निकम, मिलिंद खंडेराव आदींनी तीव्र भावना व्यक्त केल्या. उपस्थितांमध्ये भीमराव मोरे, सुखदेव सोनवणे, संजय मंजुळे, विकास रामटेके, चेतन सोनवणे, गौतम मोरे, प्रकाश निकम, नरेंद्र त्रिभुवन, विनोद वाकोडे, राहुल कानडे,  अमोल वाघमारे, दीपक दाभाडे, रतन शेलार, भाऊसाहेब पाटील, कृष्णा मापारी, धनंजय देशमुख, अनिल थोरात, आकाश वाघ, आर. पी. जाधव, मंगेश काशीदे, आरुष गायकवाड, सुनिता पाखरे, निर्मला वाघ, वैशाली कुबेर, सीमाताई बडे, ज्ञानेश्वरी बडे, मोनिकाताई केदारे, मंगलताई ठाकूर, चंदा दामोदर, अनिल सावते, सूर्यकांत पठारे, अमोल धुळे, सुनील मुनेश्वर, संशोधन सावते, नीलेश सोनवणे, अण्णा जाधव आदींचा समावेश होता. वाळूज एमआयडीसी पोलीस ठाण्याचे पोलीस निरीक्षक रामेश्वर गाडे यांच्या आदेशानुसार पोलीस उपनिरीक्षक शेख सलीम, विनोद आबूज व पोलिसांनी चोख बंदोबस्त ठेवला. निवेदन उपनिरीक्षक विनोद आबूज यांनी स्वीकारले.