गणपती पाहून परतणाऱ्या व्यावसायिकावर चाकूहल्ला!; चिकलठाण्यातील घटना

छत्रपती संभाजीनगर (सीएससीएन वृत्तसेवा) : गणपती पाहून घराकडे परतणाऱ्या व्यावसायिकावर तिघांनी चाकूचा वार केल्याची घटना चिकलठाण्यातील बालाजी हायस्कूलसमोर शुक्रवारी (५ सप्‍टेंबर) रात्री सव्वा दहाच्या सुमारास घडली. सिडको एमआयडीसी पोलिसांनी दोन हल्लेखोरांविरुद्ध शनिवारी (६ सप्‍टेंबर) दुपारी गुन्हा दाखल केला आहे.

रोहित ज्ञानेश्वर बनसोडे (वय २१, अहिल्यादेवी होळकर चौक, चिकलठाणा) असे गंभीर जखमी व्यापाऱ्याचे नाव आहे. त्‍यांचे सावंगी बायपासवर महाराष्ट्र बिल्डींग मटेरियल सप्लायर नावाचे सिमेंट व बांधकामाचे साहित्य विक्रीचे दुकान आहे. शुक्रवारी रात्री ते त्यांचे मित्र दीपक भिसे, आशिष पाईकडे, सौरभ बोंबले (सर्व रा. चिकलठाणा) यांच्यासह  चिकलठाणा येथील गणपती देखावे पाहण्यासाठी गेले होते. देखावे पाहून घराकडे एकटेच पायी येत होते.

बालाजी हायस्कूलसमोर मागून पायी चालत येणाऱ्या स्वप्नील उदमिल्ले (रा. सावित्रीनगर) व प्रतिक राजू तिवणकर (रा. कामगार कॉलनी चिकलठाणा) यांच्यापैकी स्वप्नीलने रोहित यांना धक्का दिला. त्यामुळे रोहित यांनी त्याला धक्का का दिला, असे विचारले असता  दोघांनी शिवीगाळ सुरू केली. प्रतिकने हाताचापटाने मारहाण केली. स्वप्नीलने खिशातील चाकू काढून डाव्या हाताच्या मध्यभागी मारला. रोहित ओरडू लागल्याने त्यांचे मित्र धावून आले. त्यांना पाहून स्वप्नील व प्रतिक पळून गेले. मित्रांनी रोहित यांना चिकलठाण्यातील मिनी घाटी रुग्णालयात दाखल केले. अधिक तपास पोलीस अंमलदार राजू कोतवाल करत आहेत.