बदनाम ‘मुन्नी’ने भेदली प्रोझोन मॉलची सुरक्षा!

छत्रपती संभाजीनगर (मेट्रोपोलिस पोस्ट वृत्तसेवा) : प्रोझोन मॉलमध्ये बुरखाधारी महिलांनी पल्मोनाज स्टोअरमधून सोन्याचे २ ब्रासलेट लांबवले होते. ही चोरी शेख मुन्नी उर्फ शेख परवीन अब्दुल रहीम (वय ३५) हिने तिच्या मैत्रिणीसह मिळून केली आहे. सिडको एमआयडीसी पोलिसांनी मुन्नी आणि तिचा सावत्र मुलगा आमेर हुसैन खान (वय २५, दोघे रा. संजयनगर, बायजीपुरा) यांना अटक केली आहे. प्रोझोन मॉलमध्ये चोरीची घटना समोर असल्याने मॉलमध्ये व्यवसाय करणारे व्यावसायिकांत खळबळ उडाली होती. काही दिवसांच्या फरकाने दोन चोऱ्या समोर आल्याने एकूणच प्रोझोनच्या सुरक्षेवर प्रश्नचिन्ह निर्माण झाले होते.

अमरदिप कृष्णा तुपे (वय ३३, रा. संतोषी मातानगर) यांनी चोरीची तक्रार १७ नोव्‍हेंबरला पोलिसांत दिली होती. ते प्रोझोन मॉलमधील डेमीफाईन फॅशन प्रा. लि. (पल्मोनाज स्टोअर) गोल्ड ज्वेलर्स येथे मॅनेजर आहेत. १५ नोव्‍हेंबरच्या रात्री साडेआठच्या सुमारास स्टोअरमध्ये ड्युटीवर करत असताना बुरखाधारी महिला व सोबत तोंडाला लाल स्कार्प बांधलेली महिला सोन्याचे ब्रासलेट खरेदी करण्यासाठी आले. रितेश शिंगारे या कर्मचाऱ्याने त्यांना सोन्याचे दागिने दाखवायला सुरुवात केली.

महिलेने एका नेकलेसची किंमत विचारणा केली तेव्हा रितेश काउंटरवर जाऊन त्याची किंमत पाहत असताना सर्व स्टाफची नजर चुकवून दोघींनी रॅकमधील दोन सोन्याचे ब्रासलेट ज्यावर हिरे लावलेले होते, ते चोरून नेले आहे. एक लेडीज ब्रासलेट ४१ हजार ९०० रुपयांचे होते. ज्यात सोने १.७६ ग्रॅम आणि ४३ हिरे ०.५५ कॅरेटचे होते. दुसरे लेडीज ब्रासलेट ५९ हजार रुपयांचे होते. ज्यात सोने ४.३ ग्रॅम आणि ९ हिरे ०.६५ कॅरेटचे होते. एकूण १ लाख ९०० रुपयांचे सोन्याचे ब्रासलेट दोघींनी चोरून नेले. तिच्यासोबतची स्कार्फ बांधलेली महिला मात्र अद्याप फरारी आहे.

कोण आहे मुन्नी?
शेख मुन्नी ही कुख्यात गुन्हेगार आहे. दागिन्यांच्या दालनात जाऊन चोरी करण्याचे अनेक कारनामे तिने केले आहेत. यापूर्वीही देखील तिच्याविरुद्ध ६ गुन्हे दाखल आहेत. सीसीटीव्ही फूटेजमुळे ती पोलिसांच्या जाळ्यात अडकली. काही महिन्यांपूर्वी अजमेरमधील एका गुन्ह्यात राजस्थान पोलिसांनीही तिला अटक केली होती. परळीतही तिने गुन्हे केले आहेत. २०१९ मध्ये जिन्सी भागात एका हत्‍याकांडप्रकरणी तिचा पती हर्सूल कारागृहात असून, सध्या ती सावत्र मुलासोबत राहते.