तुला मराठी बोलता येते का म्हणत ३ टवाळखोरांचा ‘यूपी’च्या तरुणावर प्राणघातक हल्ला!; मुकुंदवाडीतील घटना

छत्रपती संभाजीनगर (सीएससीएन वृत्तसेवा) : उत्तरप्रदेशातून रोजगारासाठी छत्रपती संभाजीनगरात येऊन चिकलठाणा एमआयडीसीतील द पाम्स हॉटेलमध्ये वेटर म्हणून काम करणाऱ्या १९ वर्षांच्या तरुणावर ३ टवाळखोरांनी प्राणघातक हल्ला. सुदैवाने हॉटेलमधील त्‍याचे ३ मित्र आणि पोलिसांनी वेळीच धाव घेऊन त्‍याची सुटका केली. दोन टवाळखोरांना पोलिसांनी अटक केली आहे. ही घटना सोमवारी (१ सप्‍टेंबर) रात्री मुकुंदवाडीत साडेदहाला घडली.

प्रिन्स कुसबाह शिवबालकसिंग कुसबाह (वय १९, मूळ रा. सकोहा ता. भावरकौर जिल्हा गाजीपूर राज्य उत्तर प्रदेश ह. मु. द पाम्स हॉटेल चिकलठाणा एमआयडीसी) याने या प्रकरणात तक्रार दिली आहे. तो वेटर आहे. सोमवारी (१ सप्‍टेंबर) रात्री साडेदहाला फिरण्यासाठी मुकुंदवाडी येथे आला होता. एकता लॉजिंगजवळ आला असता स्कुटीने (MH 20 HE 9727) तीन टवाळखोर त्याच्याकडे आले. त्यांनी प्रिन्सला विचारले, की तेरे को मराठी बोलना आता क्या? त्यावर प्रिन्स नाही म्हणाला. त्यानंतर टवाळखोरांनी जबरदस्तीने त्याच्या खिशातील ७०० रुपये काढून घेतले व त्याला मारहाण करण्यास सुरुवात केली. प्रिन्सने त्यांच्या तावडीतून सुटका करून घेत पेट्रोलपंपामागे जाऊन त्याचा मित्र अजयला कॉल केला. त्यानंतर पुन्हा प्रिन्सला पकडून तिघांनी मारहाण सुरू केली. त्याचा मोबाइलही हिसकावून घेतला.

त्याला मारहाण होत असतानाच प्रिन्स काम करत असलेल्या हॉटेलमधून अजय जाधव, विकास सावडे, अनिकेत कालवणे धावून आले. त्यांनी प्रिन्सला वाचवण्याचा प्रयत्न केला तरी टवाळखोर ऐकत नव्हते. त्यामुळे प्रिन्स घाबरून प्रोझोन मॉलच्या दिशेने पळाला. तेव्हा त्यांनी एपीआय कॉर्नरजवळ पकडून हातातील लोखंडी कड्याने जबर मारहाण केली. त्यापैकी एकाने प्रिन्सच्या उजव्या हाताच्या दंडावर ब्लेडने वार केला. त्याचवेळी तिथे सिडको एमआयडीसी पोलिसांची गाडी आली. पोलीस निरीक्षक गजानन कल्याणकर, सहायक पोलीस निरीक्षक भारत पाचोळे, पोलीस अंमलदार संजय नंद यांनी प्रिन्सला वाचवत दोन टवाळखोरांना पकडले. पोलिसांनी टवाळखोरांची स्कुटी जप्त केली आहे. प्रिन्सच्या तक्रारीवरून ३ टवाळखोरांविरुद्ध मुकुंदवाडी पोलिसांनी मंगळवारी (२ ऑगस्ट) गुन्हा दाखल केला आहे. अधिक तपास पोलीस उपनिरीक्षक शिवाजी घोरपडे करत आहेत.