छत्रपती संभाजीनगर (सीएससीएन वृत्तसेवा) : बँक खाते बंद पडल्याची बतावणी करून सेवानिवृत्त मुख्याध्यापकाचे सायबर भामट्याने ९७ हजार ७०० रुपये हडपल्याचा प्रकार समोर आला आहे. सातारा पोलिसांनी सोमवारी (१ सप्‍टेंबर) या प्रकरणात गुन्हा दाखल करून तपास सुरू केला आहे.
शिवप्रसाद व्यंकटलाल लाहोटी (वय ७०, रा. ग्रँडेड सोसायटी, दिशा संस्कृतीजवळ, पैठण रोड, गोलवाडी परिसर) यांनी या प्रकरणात तक्रार दिली आहे. ते पत्नी सुनिता, मुलगा रामप्रसाद यांच्यासह राहतात. ते मुख्याध्यापक पदावरून सेवानिवृत्त झालेले आहेत. त्‍यांचे एसबीआय शाखा, मोंढा, बीड येथे बँक खाते आहे. त्यात सेवानिवृत्तीची रक्कम जमा होते. २८ ऑगस्टला दुपारी साडेचारच्या सुमारास ते घरी असताना त्यांना व्हिडीओ कॉल आला. समोरच्या व्यक्तीचा चेहरा दिसला नाही. मात्र आवाज आला.
त्याने सांगितले की, तुमचे एसबीआय खाते बंद झाले आहे. ते चालू करण्यासाठी नाव विचारले. लाहोटी यांनी त्याला नाव सांगितल्यावर खाते चालू करण्याची प्रक्रिया सांगायला सुरुवात केली. लाहोटी यांनी त्याच्यावर विश्वास ठेवून प्रक्रिया पूर्ण केली. त्यानंतर त्याने फोन पे उघडण्याचा पिन क्रमांक विचारला असता त्याला लाहोटी यांनी पिन क्रमांक सांगितला. त्यानंतर त्याने बँक खाते क्रमांक विचारला. तेव्हा लाहोटी यांना फसवले जात असल्याची शंका आली.
त्यामुळे त्यांनी बँक खातेक्रमांक सांगितला नाही व लगेचच कॉल कट करत बँक बॅलेन्स चेक केले. तेव्हा बँकेत रक्कम सुरक्षित होती. त्यानंतर पुन्हा दहा मिनिटांनी त्यांनी बँक बॅलेन्स चेक केले असता खात्यातून एकूण ९७ हजार ७०० रुपये भामट्याने काढून घेतल्याचे लक्षात आले. त्यांनी लगेचच मुलाला ही बाब सांगितली. मुलाने सायबर पोलीस ठाण्यात तक्रार दिली. त्यानंतर लाहोटी यांनी सातारा पोलीस ठाण्यात येऊन तक्रार दिली. अधिक तपास पोलीस निरीक्षक कृष्णाचंद्र शिंदे करत आहेत.
.jpg)
.jpg)
.jpg)
