छत्रपती संभाजीनगर (मेट्रोपोलिस पोस्ट वृत्तसेवा) : मूळचा बुलडाणा जिल्ह्यातील रहिवासी, मात्र अनेक वर्षांपासून छत्रपती संभाजीनगरमध्ये राहणारा रमेश नावाचा स्वयंघोषित सामाजिक कार्यकर्ता सन्मान आणि पुरस्कारांसाठी इतका हपापला होता, की त्याने देशाचा सर्वोच्च पुरस्कार मिळविण्यासाठी तोतया आयएएस अधिकारी कल्पना भागवत हिला सव्वा दोन लाख रुपये दिले होते. ५० ते ६० सन्मानपत्र, शिफारशींसह त्याने फाइलही तयार केली होती, असे तपासात समोर आल्याने पोलिसांनी त्याला चौकशीसाठी हजर होण्याची नोटीस बजावली आहे.
कायम राजकीय नेत्यांसोबत उठबस असलेल्या, अधिकाऱ्यांना वेगवेगळे गिफ्ट देऊन प्रभावीत करणाऱ्या, छायाचित्रापुरते सामाजिक कार्य करणाऱ्या आणि त्याच्या मोठमोठ्या बातम्या छापून याव्यात, म्हणून धडपडणाऱ्या रमेशला कल्पनाने पुरस्काराचे आमिष दाखवल्यानंतर त्याने तब्बल ३० सन्मानपत्र, तर देशाच्या सर्वोच्च पुरस्कारासाठी १४ राज्यांतील विधानसभेचे उच्चपदस्थ अधिकारी, कॅबिनेट मंत्री, नामांकित कीर्तनकार, राजघराण्यातील व्यक्ती, आमदार, आयएएस, पोलीस अधिकारी, नामांकित रुग्णालयांच्या अध्यक्षांचे सन्मानपत्र, शिफारसपत्राची फाईल तयार केली होती. ही सन्मानपत्रे खरी की खोटी, हे अद्याप समोर आलेले नाही. मात्र प्रसिद्धीसाठी हपापलेल्या स्वभावामुळे कल्पनाने त्याला बरोबर अडकवले होते. रमेशने तिला दोन लाख २५ हजार रुपये पाठवल्याचे बँक स्टेटमेंटद्वारे समोर आले. अशाप्रकारे अनेकांनीसुद्धा नामांकित पुरस्कारासाठी फाईल तयार केल्या होत्या. मात्र त्या फायली सरकारी दरबारी सरकल्या की नाही, हे अद्याप समोर आलेले नाही.
जालना रोडवरील ॲम्बेसेडर या फाइव्ह स्टार हॉटेलमध्ये तब्बल ६ महिने बनावट कागदपत्रांच्या आधारे मुक्काम ठोकल्याने कल्पनाचे बिंग २२ नोव्हेंबरला फुटले होते. कल्पनाच्या मोबाइलमध्ये परदेशी नंबर आढळल्याने सुरुवातीला देशाच्या सुरक्षेच्या दृष्टीने तपास झाला, मात्र हे प्रकरण नंतर तोतयेगिरी आणि आर्थिक फसवणुकीपर्यंत मर्यादित असल्याचे समोर आले. आता त्यादृष्टीने सखोल तपास होत आहे. कल्पनाच्या बनवेगिरीत सहभागी असलेल्या दत्तात्रय पांडुरंग शेटे (वय ३८, रा. मांडवगण, ता. श्रीगोंदा, जि. अहिल्यानगर ) या रियल इस्टेट एजंटच्या मुसक्या शनिवारी (६ डिसेंबर) सिडको पोलिसांनी श्रीगोंद्यातून आवळल्या होत्या. त्याने कल्पनाला ७ लाख ८५ हजार रुपये पाठवले होते. सध्या शेटे पोलीस कोठडीत असून, त्याची कसून चौकशी सुरू आहे. शेटे व कल्पनाने कोणाला कोणाला नियुक्ती, बदली व पुरस्कारासाठी जाळ्यात ओढले होते, हे समोर येत आहे.
शेटेच्या माध्यमातून स्वयंघोषित सामाजिक कार्यकर्ता रमेशची ओळख कल्पनाशी झाली होती. दरम्यान, कल्पनाच्या अटकेनंतर पोलिसांनी तिचा अफगाणी प्रियकर मोहम्मद अशरफ गिल (वय २४, ह. मु. जंगपुरा, नवी दिल्ली) व केंद्रीय गृहमंत्र्यांच्या ओएसडींच्या नावाचा वापर करणारा तोतया अधिकारी डिम्पी देवेंद्रकुमार हरजाई (वय ३०, रा. पालम, दिल्ली) यांना अटक केली होती. दोघांच्या पोलीस कोठडीची मुदत संपल्याने त्यांना आज, ९ डिसेंबरला पुन्हा न्यायालयात हजर करण्यात येणार आहे. त्यांच्या वाढीव पोलीस कोठडीची मागणी पोलीस करणार आहेत. सहा दिवसांपासून डिम्पीचे कुटुंब त्याच्या जामिनासाठी शहरातील एका प्रार्थनास्थळात मुक्कामी आहेत.
.jpg)
.jpg)
.jpg)
