मैत्रिणीच्या १७ वर्षीय मुलीला युवकाने फूस लावून पळवले !; छत्रपती संभाजीनगरमध्ये खळबळ

छत्रपती संभाजीनगर (मेट्रोपोलिस पोस्ट वृत्तसेवा) : मैत्रिणीच्या १७ वर्षीय मुलीवरच युवकाची नजर फिरली. मैत्रिणीपासून वेगळे राहणे सुरू केल्यावर त्याने तिच्या मुलीला फूस लावून पळवून नेल्याची खळबळजनक घटना सिटी चौक पोलीस ठाण्याच्या हद्दीत समोर आली आहे. सिटी चौक पोलिसांनी या युवकाविरुद्ध गुन्हा दाखल करून मुलगी आणि युवकाचा शोध सुरू केला आहे.

४० वर्षीय महिलेने या प्रकरणात तक्रार दिली आहे. २०१६ मध्ये पतीच्या निधनानंतर महिला आकाश सुभाष पांडव (रा. तुळजाभवानी मंदिर, उड्डाणपुलाजवळ, रेल्वेगेट, जालना) या युवकासोबत राहत होती. तीन महिन्यांपासून हा युवक जालन्याला राहतो, तर महिला सिटी चौक पोलीस ठाण्याच्या हद्दीत राहते. सोमवारी (८ डिसेंबर) रात्री साडेदहाला महिला घरी असताना तिच्या दोन मुलींमध्ये वाद झाला. त्यामुळे महिलेने त्यातील १७ वर्षीय मुलीला समजावून सांगितले असता ती महिलेलाच वाईट बोलली. त्यामुळे महिला मुलींसह छतावरून घरात आली. राग शांत झाल्यावर १७ वर्षीय मुलगीही घरात निघून येईल, असे महिलेला वाटले.

मात्र बराच वेळ झाला तरी ती घरात आली नाही. त्यामुळे घराच्या छतावर जाऊन महिलेने पाहिले असता १७ वर्षीय मुलगी दिसून आली नाही. त्यानंतर महिलेने मुलीचा शोध सुरू केला. शोध घेत त्या खडकेश्वर येथील महादेव मंदिरात आल्या. तेथील वॉचमनला त्यांनी मुलीचा व आकाश पांडव याचा फोटो दाखवला. वॉचमनने सांगितले, की फोटोतील मुलगी बराच वेळ ग्राऊंडवर थांबून होती. या फोटोतील व्यक्तीसोबत ती पहाटे चारला एका रिक्षात बसून निघून गेली. त्यानंतर महिलेने लगेच सिटी चौक पोलीस ठाण्यात धाव घेऊन आकाशविरुद्ध मुलीच्या अपहरणाची तक्रार दिली. त्याने फूस लावून मुलीला पळवल्याचे तक्रारीत म्हटले आहे. अधिक तपास पोलीस उपनिरीक्षक मनिषा हिवराळे करत आहेत.