महिलेचे नाव, फोटो वापरून ‘इन्स्टा’वर बनावट खाते, महिलांना रिक्वेस्ट पाठवून अश्लील संभाषण करायचा..., वैजापूरच्या भऊरमधून युवकाला अटक

छत्रपती संभाजीनगर (मेट्रोपोलिस पोस्ट वृत्तसेवा) : इन्स्टाग्रामवर एका महिलेच्या नावाने बनावट खाते तयार करून, त्यावर तिचा फोटो लावून इतर महिलांना फ्रेंड रिक्वेस्ट पाठवत त्यांच्यासोबत अश्लील संभाषण करणाऱ्या विकृताला छत्रपती संभाजीनगर ग्रामीण सायबर पोलिसांनी अटक केली आहे.

जलील शहा खलील इनामदार (रा. भऊर ता. वैजापूर) असे संशयिताचे नाव आहे. १३ ऑक्टोबरला तक्रारदार महिलेने छत्रपती संभाजीनगरला येऊन सायबर पोलीस ठाण्यात तक्रार दिली होती, की कोणीतरी तिच्या फोटोचा गैरवापर करून बनावट इन्स्टाग्राम खाते तयार केले. इतर महिलांना फ्रेंड रिक्वेस्ट पाठवून तो अश्लील संभाषण करत आहे. यामुळे महिलेची बदनामी होत होती. या गुन्ह्याचा तपास सायबर पोलिसांनी सुरू केली. बनावट खात्याची माहिती काढून त्याचे तांत्रिक विश्लेषण केले असता जलील शहा याने त्याच्या बहिणीच्या  मोबाइलवर ओटीपी घेऊन त्याच्या मोबाइलमध्ये बनावट इन्स्टाग्राम खाते तयार केल्याचे समोर आले. पोलिसांनी लगेचच भऊर गाठून त्याच्या मुसक्या आवळल्‍या. त्याच्याकडील मोबाइल फोनमध्ये महिलेच्या नावाचे इन्स्टाग्राम खाते दिसून आले. त्याने बनावट खाते तयार केल्याची कबुलीही दिली. या गुन्ह्याचा तपास पोलीस अधीक्षक डॉ. विनयकुमार राठोड, पोलीस निरीक्षक प्रमोद पाटील यांच्या मार्गदर्शनाखाली तपास पथक सहायक पोलीस निरीक्षक विजयसिंग जोनवाल, सहायक फौजदार कैलास कामठे, दत्ता तरटे, सविता जायभाये, मुकेश वाघ, योगेश तरमळे, राजेश राठोड यांनी पूर्ण केला.

महिलांनी काय काळजी घ्यावी?
तुमचे सोशल मीडिया प्रोफाइल पब्लिक ऐवजी फ्रेंड्स ओन्ली किंवा प्रायव्हेटवर सेट करा. जेणेकरून अनोळखी लोक तुमची पोस्ट आणि माहिती पाहू शकणार नाहीत. तुमचा पत्ता, फोन नंबर, कामाचे ठिकाण, किंवा इतर कोणतीही संवेदनशील माहिती सार्वजनिकपणे शेअर करणे टाळा. तुमचे खासगी फोटो किंवा व्हिडीओ पोस्ट करताना विशेष काळजी घ्या. त्यांचा गैरवापर (मॉर्फिंगसह) होण्याची शक्यता असते. अनोळखी व्यक्तींकडून आलेल्या फ्रेंड रिक्वेस्ट किंवा फॉलो रिक्वेस्ट स्वीकारणे टाळा. मेसेज, ईमेल किंवा पोस्टमध्ये आलेल्या कोणत्याही अनोळखी किंवा संशयास्पद लिंकवर क्लिक करू नका. यामुळे तुमची माहिती चोरीला जाऊ शकते. महिला असल्याचे भासवून किंवा इतर प्रकारे फसवणूक करणारे अनेक लोक सोशल मीडियावर सक्रिय असतात. त्यामुळे अनोळखी व्यक्तींशी आर्थिक व्यवहार टाळा.

तुमच्या सर्व खात्यांसाठी कठीण आणि मजबूत पासवर्ड वापरा आणि ते नियमितपणे बदला. शक्य असेल तिथे टू-फॅक्टर ऑथेंटिकेशन (दोन-घटक प्रमाणीकरण) सक्रिय करा, ज्यामुळे तुमच्या खात्याची सुरक्षितता वाढेल. कोणतीही नवीन ॲप डाउनलोड करताना किंवा वापरताना ती तुमच्या फोनमधील कोणत्या माहितीची (डेटा, कॅमेरा, स्थान) परवानगी मागत आहे, हे तपासा. सोशल मीडियावर कोणी त्रास देत असल्यास किंवा छेडछाड करत असल्यास घाबरून जाऊ नका. अशा प्रकारच्या वर्तनाला उघडपणे विरोध करा किंवा त्या व्यक्तीला ब्लॉक करा. छळ करणाऱ्या व्यक्तीच्या मेसेज, कमेंट्स किंवा प्रोफाइलचे पुरावे म्हणून स्क्रीनशॉट घ्या. जर त्रास खूप वाढत असेल, तर जवळच्या पोलीस स्टेशनमध्ये किंवा सायबर सेलमध्ये त्वरित तक्रार दाखल करा.