फटाका सायलेन्सर बुलेटला पण कारवाईचा आवाज शहरभर!, ७७ बुलेटस्वारांना पोलिसांनी शिकवला धडा, १७ बुलेट केल्या जप्त

छत्रपती संभाजीनगर (मेट्रोपोलिस पोस्ट वृत्तसेवा) : फटाक्यासारखा आवाज करून धावणाऱ्या बुलेटस्वारांविरुद्ध शहर पोलिसांनी मोहीम हाती घेतली आहे. शुक्रवारी (३ ऑक्‍टोबर) एकाच दिवशी अशा तब्बल ७७ बुलेटस्वारांना धडा शिकविण्यात आला. त्‍यांच्याकडून ७७ हजार रुपये दंड वसूल करण्यात आला, तर १७ बुलेट जप्त करण्यात आल्या आहेत.

वाहनात नियमबाह्य बदल करून फटाक्यासारखा आवाज करणारे सायलेन्सर बसविण्याकडे टवाळखोरांचा कल असतो. गर्दीच्या ठिकाणावरून, कॉलेज-हॉस्पिटल परिसरातून हे टवाळखोर जाणूनबुजून जोरजोरात आवाज करत बुलेट दामटतात. वाढत्या तक्रारींमुळे शहर पोलिसांनी अशा बुलेटस्वारांविरुद्ध कारवाईची मोहीम हाती घेतली आहे. पोलीस आयुक्त प्रवीण पवार यांच्या आदेशाने शहर वाहतूक शाखेच्या पाचही विभागांनी दुपारी आणि संध्याकाळी कारवाईसत्र राबवले. बुलेटस्वारांवर कारवाई करताना त्यांच्याकडे थकलेला ९७ हजार रुपयांचा दंडही पोलिसांनी वसूल केला.

सहायक पोलीस आयुक्‍त सुभाष भुजंग, पोलीस निरीक्षक अमोल देवकर, राजेश यादव, सहायक पोलीस निरीक्षक सचिन मिरधे, सुनील कराळे, दीपक ढोणे यांच्या पथकांनी कारवाई केली. यापुढेही सातत्याने विशेष मोहीम अशा बुलेटस्वारांवर कारवाई केली जाणार आहे. वाहनधारकांनी वाहनाची आवश्यक कागदपत्रे सोबत बाळगावीत. वाहनात अनधिकृत बदल करणे टाळावे. वाहतूक नियमांचे पालन करावे, असे आवाहन शहर वाहतूक शाखेने केले आहे. मोठ्या आवाजाच्या सायलेन्सर असलेल्या बुलेट दिसल्यास नागरिकांनी पोलिसांना कळवावे, असे आवाहन सहायक पोलीस आयुक्त सुभाष भुजंग यांनी केले आहे.