Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : गेल्या ४ महिन्यांत मोबाइल चोरीला गेल्याच्या आणि हरवल्याच्या तब्बल २६ तक्रारींचा तपास पूर्ण करून हे मोबाइल शोधून परत आणण्यात जवाहरनगर पोलिसांना यश आले आहे. काही मोबाइल तर चक्क परराज्यातून पोलिसांनी जप्त करून आणले. ज्यांचे होते त्यांना हे मोबाइल आज, ४ डिसेंबरला सहायक पोलीस आयुक्त मनीष कल्याणकर यांच्या हस्ते परत करण्यात आले. त्यावेळी मोबाइल परत मिळाल्याचा सर्वांचाच आनंद गगनात मावेनासा झाला होता.
‘सीईआयआर’ पोर्टलद्वारे मोबाइल शोधण्याची जबाबदारी वरिष्ठ पोलीस निरीक्षक सचिन कुंभार यांच्या आदेशाने पोलीस अंमलदार मारोती गोरे यांनी पार पाडली. एकूण २६ महागडे मोबाइल ज्यांची एकूण किंमत ६ लाख ७० हजार रुपये आहे, ते छत्रपती संभाजीनगरसह राज्यातील अन्य जिल्हे आणि परराज्ये कर्नाटक, बिहार, मध्यप्रदेश, उत्तर प्रदेशमधून परत आणण्यात यश मिळवले. मोबाइल परत मिळाल्यानंतर एका युवतीने सांगितले, की मोबाइल साखरपुड्याला पतीने भेट दिला होता.
एका तरुणाला आई-वडिलांनी वाढदिवसाला मोबाइल गिफ्ट केलेला होता. एका विद्यार्थ्याला चांगले गुण मिळवले म्हणून आईने मोबाइल घेऊन दिला होता. मोबाइल परत मिळाल्याचा आनंद सर्वांच्याच चेहऱ्यावर झळकत होता. त्यांनी जवाहरनगर पोलिसांचे आभार मानले. मोबाइल शोधून आणण्याची कामगिरी पोलीस आयुक्त प्रवीण पवार, पोलीस उपायुक्त प्रशांत स्वामी, सहायक पोलीस आयुक्त मनिष कल्याणकर, वरिष्ठ पोलीस निरीक्षक सचिन कुंभार यांच्या मार्गदर्शनाखाली पोलीस अंमलदार मारोती गोरे, यांनी केली.
नागरिकांना आवाहन करण्यात येते की मोबाइल हरवला किंवा चोरी गेल्यास त्वरित पोलिसांकडे तक्रार दाखल करावी. जेणेकरून शोधकार्य अधिक प्रभावीपणे करता येईल. -सचिन कुंभार, वरिष्ठ पोलीस निरीक्षक, जवाहरनगर पोलीस ठाणे
.jpeg)
.jpg)
.jpg)
