आयसीयूमधून महिलेच्या मृतदेहावरील अडीच लाखांचे दागिने चोरीला!, छत्रपती संभाजीनगरच्या जे. जे. प्लस हॉस्पिटलमधील धक्कादायक प्रकार

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर शहरातील सेशन कोर्टासमोरील डॉ. जीवन राजपूत यांच्या जे. जे. प्लस हॉस्पिटलच्या आयसीयूमधून रुग्ण महिलेच्या अंगावरून अडीच लाखांचे दागिने चोरीला गेल्याने खळबळ उडाली आहे. शुक्रवारी (२८ नोव्‍हेंबर) या प्रकरणी क्रांती चौक पोलिसांनी गुन्हा दाखल करून दागिन्यांचा शोध सुरू केला आहे. महिलेच्या मुलांनी हॉस्पिटलच्या स्टाफवर संशय व्यक्त केला आहे. दरम्यान, धूत हॉस्पिटलच्या आयसीयूतूनही रुग्णाची ५० हजार रुपयांची सोन्याची अंगठी चोरीला गेल्याचा गुन्हा २६ नोव्‍हेंबरला सिडको एमआयडीसी पोलीस ठाण्यात दाखल झाला होता. त्यानंतर आता जे. जे. प्लस हॉस्पिटलमध्ये हा प्रकार घडल्याचे समोर आल्याने नामांकीत समजल्या जाणाऱ्या हॉस्पिटलमध्ये होणाऱ्या चोऱ्यांचा प्रश्न गंभीर बनला आहे.

संदीप मनोहर गायकवाड (वय ३८, रा. शिवनगर, चाळीसगाव रोड, ता. कन्नड) यांनी या प्रकरणात तक्रार दिली आहे. तक्रारीनुसार, १३ नोव्हेंबरला सकाळी ७ च्या सुमारास त्यांची आई बिजलाबाई मनोहर गायकवाड (वय ६३) यांना अचानक श्वास घ्यायला त्रास होत असल्याने संदीप व त्यांचे भाऊ किरण यांनी आईला रुग्णवाहिकेतून छत्रपती संभाजीनगरला आणले. सेशन कोर्टासमोरील डॉ. जीवन राजपूत यांच्या जे. जे. प्लस हॉस्पिटलमध्ये उपचारासाठी दाखल केले. बिजलाबाई यांची प्रकृती जास्त बिघडल्याने डॉक्टरांनी त्यांना आयसीयूत दाखल करून घेतले. त्यावेळी गळ्यात सोन्याची साखळी, कानातील सोन्याच्या वेलसह टॉप्स हे दागिणे आईच्या बिजलाबाई यांच्या अंगावरच होते. साधारण दुपारी १ ते दीडदरम्यान डॉ. दिनेश पांडव व डॉ. शैलेश खरे यांनी आयसीयूबाहेर येऊन सांगितले, की तुमच्या आईला वाचविण्याचा आम्ही पूर्ण प्रयत्न केला. मात्र त्या आता राहिल्या नाहीत. त्यानंतर किरण हे आईला बघायला गेले असता बिजलाबाई निपचीत पडलेल्या होत्या.

सर्व दागिणे त्यांच्या अंगावरच होते. तिथून क्रांती चौक पोलिसांच्या सांगण्यावरून मृतदेह घाटी रुग्णालयात उत्तरीय तपासणीसाठी नेत असताना किरण यांनी घाटीत नेण्याआधी आईचे दागिने काढून घ्यावेत, म्हणून पाहिले असता अंगावर दागिने दिसले नाहीत. त्यांनी कुटुंबीयांना दागिने काढून घेतलेत का, अशी विचारणा केली. त्यावर त्यांनी दागिने आमच्याकडे हॉस्पिटलने दिले नाहीत, असे सांगितले. त्यानंतर संदीप व किरण यांनी आयसीयूच्या दरवाजावर बसलेल्या सुरक्षारक्षक महिलेला विचारले. मात्र त्यांनाही काही माहीत नव्हते. आयसीयूमधून दागिने कुणीतरी काढून घेत चोरल्याचे समोर आल्याने संदीप यांनी क्रांती चौक पोलीस ठाण्यात १ लाख २० हजार रुपयांची २ तोळे सोन्याची साखळी, १ लाख २० हजार रुपयांचे २ तोळ्याचे सोन्याचे कानातील वेलसह कानातले टॉप्स असे एकूण २ लाख ४० हजार रुपयांचे दागिने चोरीला गेल्याची तक्रार केली.

कुणावर संशय?
तक्रारीनुसार, आयसीयू वॉर्डमध्ये असणारे डॉ. दिनेश पांडव व डॉ. शैलेश खरे यांनी संदीप व किरण यांना बिजलाबाई यांच्या गळ्यातील सोन्याच्या साखळीत असलेले अंदाजे एखा‌द्या ग्रॅमचे गौतम बुद्धांचे पेंडल दिले व सांगितले, की तुमच्या आईचे उपचार करत असताना त्यांच्या अंगावरील दागिने बघितले होते. त्यानंतर जे. जे. प्लस हॉस्पिटलचे सीईओ डॉ. प्रशांत पाटील यांनी संदीप व किरण यांना सांगितले, की तुमच्या आईचे सोने १०० टक्‍के सात दिवसांच्या आत परत करतो. मात्र अ‌द्यापपर्यंत त्यांनी आईचे चोरीला गेलेले दागिने परत केले नाही. त्यामुळे जे. जे. प्लस हॉस्पिटलमधील हाउस किपींग स्टाफ, नर्सिंग स्टाफ अन्य स्टाफवर संशय व्यक्त करत त्यांच्यापैकीच कुणीतरी दागिने चोरल्याचा संशय व्यक्त करण्यात आला आहे. अधिक तपास पोलीस अंमलदार संतोष मुदिराज करत आहेत.